തലശ്ശേരി: പ്രമുഖ നടിയെ തട്ടിക്കൊണ്ടുപോയ കേസില്‍ തലശ്ശേരി സ്വദേശിയും. കതിരൂര്‍ ചുണ്ടങ്ങാപ്പൊയില്‍ മംഗലശ്ശേരി വീട്ടില്‍ വി.പി വിജീഷാണു പ്രതിപ്പട്ടികയിലുള്ളത്.
ഇയാളെ പൊലിസ് തിരിച്ചറിഞ്ഞതിനെ തുടര്‍ന്നു മുഖ്യപ്രതി പള്‍സര്‍ സുനി, മറ്റൊരു പ്രതി തമ്മനം സ്വദേശി മണികണ്ഠന്‍ എന്നിവര്‍ക്കൊപ്പം ഹൈക്കോടതിയില്‍ മുന്‍കൂര്‍ ജാമ്യത്തിന് ശ്രമം ആരംഭിച്ചു.
ആര്‍.എസ്.എസ് നേതാവ് കതിരൂര്‍ മനോജ് വധക്കേസ് പ്രതി സജൂട്ടി എന്ന സജിലേഷിന്റെ സഹോദരനാണു വിജീഷ്.നടിയെ തട്ടിക്കൊണ്ടുപോയ കേസില്‍ പ്രതിസ്ഥാനത്തുള്ള വിഗീഷ് രണ്ടുവര്‍ഷം മുന്‍പ് കതിരൂരില്‍ പ്രാദേശിക ചിട്ടി വെട്ടിപ്പ് നടത്തി നാട്ടില്‍ നിന്ന് മുങ്ങിയിരുന്നതായി നാട്ടുകാര്‍ പറയുന്നു. വയറിങ് തൊഴിലാളിയായിരുന്ന ഇയാള്‍ എട്ടുമാസം മുന്‍പ് നാട്ടില്‍ വന്നിരുന്നു. ഒഡീഷയില്‍ ബേക്കറി ജോലിക്കെന്നു പറഞ്ഞ് നാട്ടില്‍ നിന്ന് പോയതാണെന്നും അന്വേഷണസംഘം കണ്ടെത്തി. ഇയാള്‍ പാലക്കാട് ഒളിവില്‍ കഴിയുന്നതായുള്ള വിവരവും അന്വേഷണ സംഘത്തിനു ലഭിച്ചിട്ടുണ്ട്.