ബാസിത് ഹസന്‍#

തൊടുപുഴ: സംസ്ഥാനത്ത് ഒരാഴ്ചയായി പതിവ് തെറ്റിച്ച് ശൈത്യം തുടരുന്നത് വൈദ്യുതി ബോര്‍ഡിന് നേട്ടമായി. പ്രതിദിന വൈദ്യുതി ഉപഭോഗത്തില്‍ ശരാശരി 40 ലക്ഷം യൂനിറ്റിന്റെ കുറവാണ് ഇപ്പോള്‍ ഉണ്ടാകുന്നത്.
കേന്ദ്ര വിഹിതത്തിലും പവര്‍ പര്‍ച്ചേസ് കരാര്‍ പ്രകാരമുള്ള വൈദ്യുതിയിലും കുറവുണ്ടാകാത്തതിനാല്‍ ആഭ്യന്തര ഉല്‍പാദനം കുറച്ചുനിര്‍ത്താന്‍ കഴിയുന്നതും നേട്ടമായി. സാധാരണ നവംബര്‍ അവസാനം മുതല്‍ ഉണ്ടാകുന്ന തണുപ്പ് ഇക്കുറി ഉണ്ടായില്ല. ഡിസംബര്‍ 29 ഓടെ ഇക്കുറി ശൈത്യം കനക്കുകയായിരുന്നു.

ക്രിസ്മസ് ദിനത്തില്‍ 70.91 ദശലക്ഷം യൂനിറ്റായിരുന്നു സംസ്ഥാനത്തെ വൈദ്യുതി ഉപഭോഗം. ഡിസംബര്‍ 26 ന് 72.74, 27 ന് 72.91, 28 ന് 70.03 ദശലക്ഷം യൂനിറ്റ് എന്നിങ്ങനെയായിരുന്നു ഉപഭോഗം.

പിന്നീട് തണുപ്പ് വര്‍ധിച്ചതോടെ ഉപഭോഗം കുറയുകയായിരുന്നു. പുതുവത്സര ആഘോഷത്തില്‍ പോലും ഉപഭോഗം 67.92 ദശലക്ഷം യൂനിറ്റ് മാത്രമായിരുന്നു. 2019 ജനുവരി ഒന്നിന് 65.69 ദശലക്ഷം യൂനിറ്റും ഇന്നലെ 63.91 ദശലക്ഷം യൂനിറ്റുമായിരുന്നു ഉപഭോഗം.
പാര്‍ലമെന്റ് തെരഞ്ഞെടുപ്പ് - പരീക്ഷക്കാലം വെല്ലുവിളിയായി മുന്നില്‍ നില്‍ക്കുന്ന കെ.എസ്.ഇ.ബി ക്ക് ആഭ്യന്തര ഉല്‍പാദനം കുറച്ചതോടെ കരുതല്‍ ജലശേഖരം പിടിച്ചുനിര്‍ത്താന്‍ കഴിയുന്നുണ്ട്. അടുത്ത മാര്‍ച്ച്, ഏപ്രില്‍ മാസങ്ങളില്‍ വൈദ്യുതി പ്രതിസന്ധിയുണ്ടാകാതിരിക്കാനുള്ള ആസൂത്രണമാണ് ബോര്‍ഡ് നടത്തുന്നത്. മാര്‍ച്ച് - ഏപ്രില്‍ മാസങ്ങളില്‍ ഉപഭോഗം 80 ദശലക്ഷം യൂനിറ്റ് കടക്കുമെന്നാണ് വൈദ്യുതി ബോര്‍ഡിന്റെ നിഗമനം. അതേസമയം, കെ.എസ്.ഇ.ബി അണക്കെട്ടുകളിലെ ജലനിരപ്പ് മുന്‍വര്‍ഷത്തേതിലും താഴെയായി. ഇന്നലെ രാവിലത്തെ കണക്ക് പ്രകാരം 71 ശതമാനമാണ് അണക്കെട്ടുകളിലെ ജലനിരപ്പ്. ഒരു മാസത്തിനിടെ അഞ്ച് ശതമാനം വെള്ളമാണ് കുറഞ്ഞത്. 2018 ലെ പുതുവര്‍ഷത്തില്‍ ഇത് 72 ശതമാനമായിരുന്നു. 2922.847 ദശലക്ഷം യൂനിറ്റ് വൈദ്യുതി ഉത്പ്പാദിപ്പിക്കാനുള്ള വെള്ളമാണ് നിലവില്‍ എല്ലാ സംഭരണികളിലുമായി ഉള്ളത്. കഴിഞ്ഞ വര്‍ഷം ഇതേദിവസം 2979.13 ദശലക്ഷം യൂനിറ്റിനുള്ള വെള്ളം ഉണ്ടായിരുന്നു. അടുത്ത മഴ വര്‍ഷത്തിന് ഇനി 147 ദിവസങ്ങള്‍ അവശേഷിക്കുന്നുണ്ട്.
ചരിത്രത്തിലെ തന്നെ ഏറ്റവും ഉയര്‍ന്ന മഴ രേഖപ്പെടുത്തിയിട്ടും ജലനിരപ്പ് പെട്ടെന്ന് താഴുന്നത് ആശങ്കയുയര്‍ത്തുന്നുണ്ട്. അതേ സമയം ഏറ്റവും വലിയ ജലവൈദ്യുതി പദ്ധതിയായ ഇടുക്കിയില്‍ മുന്‍ വര്‍ഷത്തേക്കാള്‍ എട്ട് ശതമാനം വെള്ളം കൂടുതലുണ്ട്. 2379.61 അടിയാണ് ഇടുക്കിയിലെ ഇന്നലത്തെ ജലനിരപ്പ്, 74 ശതമാനം.

പമ്പ-65, ഇടമലയാര്‍-62, ഷോളയാര്‍-82, പൊന്മുടി - 83, കുണ്ടള - 97, മാട്ടുപ്പെട്ടി- 81, ലോവര്‍ പെരിയാര്‍ - 62, പെരിങ്ങല്‍കുത്ത് - 40 ശതമാനം എന്നിങ്ങനെയാണ് പ്രധാന സംഭരണികളിലെ ജലശേഖരം. രണ്ട് മാസമായി ആനയിറങ്കല്‍ ഡാം നിറഞ്ഞുകിടക്കുകയാണ്.