പുല്‍പ്പള്ളി: ഹര്‍ത്താല്‍ ദിനത്തില്‍ പുല്‍പ്പള്ളിയില്‍ തുറന്ന് പ്രവര്‍ത്തിച്ച ഷാജി ടെക്സ്റ്റയില്‍സ് സംഘം ചേര്‍ന്ന് ആക്രമിച്ച സംഭവവുമായി ബന്ധപ്പെട്ട് രണ്ടു പേരെ പുല്‍പ്പള്ളി പൊലിസ് അറസ്റ്റ് ചെയ്തു.
ബി.ജെ.പി പ്രവര്‍ത്തകരായ അമല്‍ അമ്പാടി, വിജേഷ് എന്നിവരെയാണ് പുല്‍പ്പള്ളി എസ്.എച്ച്.ഒ റെജീന കെ. ജോസ്, എസ്.ഐ മണികണ്ഠന്‍ എന്നിവരുടെ നേതൃത്വത്തിലാണ് അറസ്റ്റ്. പ്രതികളെ ബത്തേരി ഫസ്റ്റ് ക്ലാസ് മജിസ്‌ട്രേറ്റ് കോടതി 14 ദിവസത്തേക്ക് റിമാന്‍ഡ് ചെയ്തു.
സംഭവവുമായി ബന്ധപ്പെട്ട് മറ്റ് പ്രതികള്‍ക്കായി തെരച്ചില്‍ ഊര്‍ജിതപ്പെടുത്തിയതായി പൊലിസ് പറഞ്ഞു.
സി.സി.ടി.വി ദൃശ്യങ്ങള്‍ പരിശോധിച്ചാണ് അക്രമവുമായി ബന്ധപ്പെട്ടവരെ പിടികൂടിയത്. കഴിഞ്ഞ ദിവസം നാലുപേരെ പൊലിസ് അറസ്റ്റ് ചെയ്തിരുന്നു. ഹര്‍ത്താല്‍ ദിനത്തില്‍ വണ്ടിക്കടവില്‍ വെളിയംകോട് മാനുവലിന്റ കട ആക്രമിച്ച സംഭവത്തില്‍ വെളിയംപറമ്പില്‍ രജേഷിനെയും പൊലിസ് അറസ്റ്റ് ചെയ്തു. സംഭവവുമായി ബന്ധപ്പെട്ട് ഒരാളെ കൂടി പിടികൂടാന്‍ ഉണ്ടെന്ന് പൊലിസ് പറഞ്ഞു. ഹര്‍ത്താല്‍ ദിനത്തിലുണ്ടായ അക്രമത്തെ തുടര്‍ന്ന് പുല്‍പ്പള്ളി ടൗണില്‍ പൊലിസ് കനത്ത സുരക്ഷയാണ് ഒരുക്കിയിരിക്കുന്നത്.