കൊല്ലം: കോളജിലേക്ക് പോയ ശേഷം കാണാതായ വിദ്യാര്‍ഥിനിയുടെ മൃതദേഹം ഇത്തിക്കരയാറ്റില്‍ കണ്ടെത്തി. പാരിപ്പള്ളി എഴിപ്പുറം ഷൈന്‍ വിഹാറില്‍ സുഭാഷിന്റെ മകള്‍ ഐശ്വര്യയുടെ (20) മൃതദേഹമാണ് ഇന്നലെ രാവിലെ കണ്ടെത്തിയത്. കൊല്ലം ശ്രീനാരായണ കോളജിലെ അവസാനവര്‍ഷ മ്യൂസിക് ബിരുദ വിദ്യാര്‍ഥിയാണ്.
വ്യാഴാഴ്ച രാവിലെ കോളജിലേക്കു പോയ ഐശ്വര്യ വൈകിയും തിരിച്ചുവരാതിരുന്നതിനെത്തുടര്‍ന്ന് ബന്ധുക്കള്‍ പാരിപ്പള്ളി പൊലിസില്‍ പരാതി നല്‍കിയിരുന്നു. മൊബൈല്‍ ഫോണ്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തില്‍ ഇത്തിക്കര പാലത്തിന് തെക്കുവശത്തുള്ള റബര്‍തോട്ടത്തില്‍നിന്ന് ബാഗും മൊബൈല്‍ ഫോണും കണ്ടെത്തി. തുടര്‍ന്നുള്ള അന്വേഷണം നടക്കുന്നതിനിടെ ഇന്നലെ രാവിലെ മീനാട് പാലമൂട് ഭാഗത്ത് ഇത്തിക്കരയാറ്റില്‍ മൃതദേഹം കണ്ടെത്തുകയായിരുന്നു. മൊബൈല്‍ ഫോണില്‍നിന്ന് വിവരങ്ങളെല്ലാം ഡിലീറ്റ് ചെയ്തിട്ടുള്ളതായി പൊലിസ് അറിയിച്ചു. മാതാവ്: സീമ. സഹോദരി: ഗായത്രി.