മദ്യപിച്ചു ലക്കുകെട്ട ഡ്രൈവറെ ഉള്‍പ്പെടെ നാട്ടുകാര്‍  പൊലിസില്‍ ഏല്‍പ്പിച്ചു
കാട്ടാക്കട: അമിതവേഗതയില്‍ ചീറിപ്പാഞ്ഞ കാര്‍  വാഹനങ്ങളെ ഇടിച്ചു തെറിപ്പിച്ചു. സംഭവത്തില്‍ രണ്ടു പേര്‍ക്ക് പരുക്കേറ്റു. മദ്യപിച്ചു ലക്കുകെട്ട കാര്‍ ഡ്രൈവര്‍ അടക്കമുള്ളവരെ നാട്ടുകാര്‍  പിടികൂടി പൊലിസില്‍ ഏല്‍പ്പിച്ചു.
ഇന്നലെ രാത്രി ഏഴരയോടെയാണ് സംഭവം. കാട്ടാക്കട  നിന്നും നെയ്യാര്‍ഡാം ഭാഗത്തേക്ക്  അമിത വേഗതയില്‍ പോകുകയായിരുന്ന കാര്‍  പി.ആര്‍  വില്ലിയം സ്‌കൂളിനു സമീപം വച്ച് സ്‌കൂട്ടര്‍ ഇടിച്ചു തെറിപ്പിച്ച് നിറുത്താതെ പോയി. തുടര്‍ന്ന് മൂഴിയില്‍ വഴിയരികില്‍ ഇരുന്ന സ്‌കൂട്ടറും  കാട്ടാക്കട ഭാഗത്തേക്ക് വരികയായിരുന്ന സ്‌കൂട്ടറും ഇടിച്ചു തെറിപ്പിച്ചു. സ്‌കൂട്ടര്‍ യാത്രികരായ രണ്ടു പേര്‍ക്ക് പരുക്കേറ്റു. ഇടിയുടെ ആഘാതത്തില്‍  വാഹനങ്ങള്‍ പൂര്‍ണമായും തകര്‍ന്നു. സംഭവം കണ്ടു നാട്ടുകാര്‍ ഓടി കൂടിയപ്പോഴേക്കും ഒരാള്‍ വാഹനത്തില്‍ നിന്നും ഓടി രക്ഷപ്പെട്ടു.മറ്റു മൂന്നുപേരെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു. വാഹനത്തില്‍ നിന്നും പൊട്ടിക്കാത്തതും പൊട്ടിച്ചതുമായി അഞ്ചോളം വിദേശ മദ്യവും ബിയര്‍ കുപ്പികളും പൊലിസ് കണ്ടെടുത്തു.