കൊച്ചി: കേന്ദ്രസര്‍ക്കാര്‍ പൗരത്വ നിയമത്തിന് പിന്നാലെ പോകുമ്പോള്‍ പൗരന്മാരുടെ ജീവിതം ദുരിതമായി മാറുന്നു. അസഹനീയമായ വിലക്കയറ്റവും തൊഴിലവസരങ്ങളിലുള്ള നഷ്ടവും ജനജീവിതം വഴിമുട്ടിച്ചിരിക്കുകയാണ്.
കഴിഞ്ഞ അഞ്ചരവര്‍ഷത്തിനിടയിലെ ഏറ്റവും ഉയര്‍ന്ന വിലക്കയറ്റമാണ് നിലവില്‍ രാജ്യത്ത് അനുഭവപ്പെടുന്നതെന്ന് സര്‍ക്കാര്‍ ഏജന്‍സികള്‍ തന്നെ സമ്മതിക്കുമ്പോള്‍ അതിനെയും കടത്തിവെട്ടുന്നതാണ് മാര്‍ക്കറ്റിലെ യാഥാര്‍ഥ്യങ്ങള്‍. സാധനങ്ങള്‍ വാങ്ങാന്‍വരുന്നവരുടെ എണ്ണം കുറഞ്ഞതിനെതുടര്‍ന്ന് വിപണിയില്‍ കടുത്ത മാന്ദ്യമാണ് അനുഭവപ്പെടുന്നത്. ഇക്കഴിഞ്ഞ ക്രിസ്മസ്-ന്യൂഇയര്‍ വിപണിയേയും മാന്ദ്യം മങ്ങലേല്‍പ്പിച്ചിരുന്നു.
ദിനംപ്രതി വില കുതിച്ചുയരുന്നതുമൂലം ഉപഭോക്താക്കള്‍ വാങ്ങുന്ന സാധനങ്ങളുടെ അളവ് കുറച്ചതും വിപണിക്ക് തിരിച്ചടിയായി. വിവിധ മാര്‍ക്കറ്റുകളില്‍നിന്ന് തൊഴിലുപേക്ഷിച്ച് പോയവര്‍ 40ശതമാനമാണ്. ഇവരിലേറെയും ദിവസക്കൂലിക്ക് പണിയെടുക്കുന്ന ഇതരസംസ്ഥാന തൊഴിലാളികളാണ്. കച്ചവടം കുറഞ്ഞതിനെ തുടര്‍ന്ന് മാര്‍ക്കറ്റുകളില്‍ ലോഡ് എത്തുന്നത് 50 ശതമാനമായി കുറഞ്ഞിരിക്കുകയാണ്. കേന്ദ്ര ഏജന്‍സിയായ നാഷനല്‍ സ്റ്റാറ്റിസ്റ്റിക്കല്‍ ഓഫിസ് പുറത്തുവിട്ട കണക്കനുസരിച്ച് കഴിഞ്ഞ അഞ്ചര വര്‍ഷത്തിനിടയിലെ ഏറ്റവും വലിയ വിലക്കയറ്റത്തിലൂടെയാണ് രാജ്യം കടന്നുപൊയ്‌ക്കൊണ്ടിരിക്കുന്നത്. ഡിസംബറില്‍ മാത്രം പച്ചക്കറിയിനങ്ങളുടെ വില വര്‍ധന ദേശീയാടിസ്ഥാനത്തില്‍ 60.5 ശതമാനമാണ്. നവംബറില്‍ 36 ശതമാനമായിരുന്നു പച്ചക്കറി വിലക്കയറ്റം. ഒക്ടോബര്‍ മുതലുള്ള കണക്കനുസരിച്ച് സവാളക്ക് മാത്രം 200 ശതമാനത്തിനടുത്ത വിലക്കയറ്റമാണുണ്ടായത്.
അരിയടക്കമുള്ള ധാന്യവര്‍ഗങ്ങള്‍ക്കും മാസന്തോറും അഞ്ച് ശതമാനം വിലക്കയറ്റമാണ് അനുഭവപ്പെടുന്നത്. ദിനംതോറുമുള്ള പെട്രോള്‍, ഡീസല്‍ വില വര്‍ധനവും ജനജീവിതം ദുസ്സഹമാക്കുന്നുണ്ട്. ഡീസല്‍ വിലവര്‍ധന കാരണം ചരക്ക് കടത്ത് കൂലി കുത്തനെ വര്‍ധിക്കുന്നതാണ് പ്രശ്‌നം.
അരിയും ഗോതമ്പും പച്ചക്കറിയുമടക്കമുള്ള മുഴുവന്‍ അവശ്യസാധനങ്ങള്‍ക്കും ഇതര സംസ്ഥാനങ്ങളെ ആശ്രയിക്കേണ്ടിവരുന്ന കേരളത്തിനാണ് ചരക്ക് കടത്ത് കൂലിയിലെ വര്‍ധന കനത്ത തിരിച്ചടിയായി മാറുന്നത്. രാജ്യത്ത് 16 ലക്ഷം തൊഴിലവസരങ്ങള്‍ കുറഞ്ഞതായും വിവിധ ഏജന്‍സികള്‍ നടത്തിയ പഠനത്തില്‍ പറയുന്നു. പ്രൊഫഷനല്‍ വിദ്യാഭ്യാസ യോഗ്യത വരെ നേടിയ ചെറുപ്പക്കാര്‍ തൊഴിലില്ലാതെ നട്ടംതിരിയുന്ന അവസ്ഥയാണ് നിലവില്‍. കുറഞ്ഞവേതനത്തിന് തൊഴിലെടുക്കുന്ന ഉന്നതവിദ്യാഭ്യാസ യോഗ്യതയുള്ളവരുടെ എണ്ണവും കൂടിയിട്ടുണ്ട്.
വിവിധ സ്ഥാപനങ്ങള്‍ അടച്ചുപൂട്ടല്‍ ഭീഷണി നേരിടുന്നതും തൊഴിലവസരങ്ങള്‍ കുറയാന്‍ കാരണമായിട്ടുണ്ട്. നോട്ട്‌നിരോധനത്തെതുടര്‍ന്ന് സംഭവിച്ച തകര്‍ച്ചയില്‍നിന്ന് മൂന്ന് വര്‍ഷം കഴിഞ്ഞിട്ടും കരകയറാന്‍ സ്ഥാപനങ്ങള്‍ക്ക് കഴിഞ്ഞിട്ടില്ലെന്നാണ് കണക്കുകള്‍ സൂചിപ്പിക്കുന്നത്. ഇത് സാമ്പത്തിക മേഖലയെ തകിടം മറിച്ചിരിക്കുകയാണ്. അസംസ്‌കൃത വസ്തുക്കളുടെ വിലവര്‍ധനവ് മൂലം നിര്‍മാണ മേഖലയും കടുത്ത പ്രതിസന്ധിയാണ് നേരിടുന്നത്.