കോഴിക്കോട്: നവോത്ഥാന ചരിത്രവും സങ്കല്‍പവും തിരുത്തണമെന്നും മമ്പുറം തങ്ങളും മഖ്ദൂമുമാരും മുസ്‌ലിം നവോത്ഥാന നേതാക്കളാണെന്നും ഐ.എസ്.എം മര്‍കസുദ്ദഅ്‌വ വിഭാഗം.
നവോത്ഥാന കൊളോക്യത്തോട് അനുബന്ധിച്ച് നടത്തിയ വാര്‍ത്താ സമ്മേളനത്തിലാണ് ഡോ. ജാബിര്‍ അമാനിയുടെ പ്രതികരണം.
മക്തി തങ്ങളെയും വക്കം മൗലവിയെയും മാത്രം മുസ്‌ലിം നവോത്ഥാന നായകരായി പരിഗണിക്കുന്നത് ശരിയല്ല. ഇസ്‌ലാം കേരളത്തില്‍ എത്തിയതുമുതല്‍ നവോത്ഥാനം തുടങ്ങിയിട്ടുണ്ട്. മാലിക്ബ്‌നു ദീനാറും മഖ്ദൂം കുടുംബവും മമ്പുറം തങ്ങളും വെളിയങ്കോട് ഉമര്‍ ഖാസിയും എല്ലാം മുസ്‌ലിം നവോത്ഥാനത്തിന്റെ നായകര്‍ തന്നെ.
നവോത്ഥാനത്തെ ഏതെങ്കിലും സംഘടനയുടേയോ പ്രസ്ഥാനത്തിന്റേയോ ഭാഗമാക്കുമ്പോഴാണ് ഇവരൊക്കെ നവോത്ഥാനപട്ടികയില്‍ ഇടം നേടാതെ പോകുന്നത്. മുജാഹിദ് വിഭാഗത്തിനു അത്തരം തെറ്റുകള്‍ ഉണ്ടായിരിക്കാമെന്നും അദ്ദേഹം പറയുന്നു. നവോത്ഥാന ചരിത്രമാണ് ആദ്യം തിരുത്തേണ്ടതെന്ന് കോട്ടക്കലില്‍ നടക്കുന്ന കൊളോക്യത്തിന്റെ ലഘുലേഖയിലും സൂചിപ്പിക്കുന്നു.
ആദര്‍ശപരമായും സംഘടനാ പരമായും നയപരമായുമുള്ള കരാറിലെ വ്യവസ്ഥകള്‍ ലംഘിച്ചതുകൊണ്ടാണ് മുജാഹിദ് ഐക്യം തകര്‍ന്നതെന്നും അതിന് സി.ഡി ടവര്‍ വിഭാഗം മറുപടി പറയണമെന്നും അദ്ദേഹം പറഞ്ഞു.
ആദര്‍ശത്തിലാണ് പ്രധാന അഭിപ്രായഭിന്നത. ഐക്യം നടന്നതിനു പിന്നാലെ കരാര്‍ ലംഘിക്കപ്പെട്ടു. ആദര്‍ശം,നയപരം, സംഘടനാ തലത്തിലെ ഭിന്നത എന്നിവ പരിഹരിച്ചാല്‍ ഐക്യം വീണ്ടും യാഥാര്‍ഥ്യമാകും. ഐക്യ നാടകങ്ങള്‍ ഇനിയില്ല. ഐ.എസ് റിക്രൂട്ട്‌മെന്റില്‍ തങ്ങളുടെ പ്രവര്‍ത്തകര്‍ ഇല്ലെന്ന് ഉറപ്പു നല്‍കാനാകുമെന്നും ഏത് ഏജന്‍സികളുടെ അന്വേഷണവും നേരിടാന്‍ തയാറാണെന്നും അദ്ദേഹം പറഞ്ഞു.
എന്നാല്‍ സലഫിസത്തില്‍ തീവ്ര ചിന്താഗതിക്കാരുണ്ടെന്നും അവ ചില തീവ്രസംഘടനകളിലേക്കുള്ള ആശയങ്ങളുടെ വഴിയായി മാറിയിട്ടുണ്ടെന്നും അവര്‍ പറയുന്നു.
കെ.എന്‍.എം മര്‍കസു ദഅ്‌വ സംസ്ഥാന വൈസ് പ്രസിഡന്റ് അഡ്വ.പി.എം ഹനീഫ,ഐ.എസ്.എം പ്രസിഡന്റ് ഡോ. ജാബിര്‍ അമാനി, ജന.സെക്രട്ടറി ഡോ.കെ.ടി അന്‍വര്‍ സാദത്ത്, ഫോക്കസ് ജന.സെക്രട്ടറി ശൂകൂര്‍ കോണിക്കല്‍ തുടങ്ങിയവരാണ് വാര്‍ത്താ സമ്മേളനം നടത്തിയത്.