തിരുവനന്തപുരം: സമ്മേളനം കഴിഞ്ഞിറങ്ങിയ നാലു എം.എല്‍.എമാര്‍ നിയമസഭയിലെ ലിഫ്റ്റില്‍ കുടുങ്ങി. എം.എല്‍.എമാര്‍ മാത്രം ഉപയോഗിക്കുന്ന രണ്ടു ലിഫ്റ്റുകളില്‍ ഒന്നാണ് കേടായത്. പതിനഞ്ചു മിനുട്ടോളം എം.എല്‍.എമാരായ തിരുവഞ്ചൂര്‍ രാധാകൃഷ്ണന്‍, വി.പി സജീന്ദ്രന്‍, സണ്ണി ജോസഫ്, എം.വിന്‍സന്റ് എന്നിവര്‍ ലിഫ്റ്റിനുള്ളില്‍ അകപ്പെട്ടു.  തുടര്‍ന്ന് എമര്‍ജന്‍സി നമ്പറില്‍ ബന്ധപ്പെട്ട് ടെക്‌നീഷ്യനെ വരുത്തി എം.എല്‍.എമാരെ പുറത്തിറക്കുകയായിരുന്നു. എം.എല്‍.എമാര്‍ ഉപയോഗിക്കുന്ന രണ്ടു ലിഫ്റ്റുകളില്‍ ഒന്ന് ഗവര്‍ണര്‍ക്കു വേണ്ടി മാത്രമായി ഒരുക്കിയിരുന്നു. അതിനാലാണ് എം.എല്‍.എമാര്‍ മറ്റൊരു ലിഫ്റ്റ് ഉപയോഗിച്ചത്. നേരത്തെയും ഈ ലിഫ്റ്റ് പ്രശ്‌നക്കാരനായിട്ടുണ്ട്. മൂന്നു വര്‍ഷം മുന്‍പ് അന്നത്തെ മന്ത്രിമാരായ പി.കെ കുഞ്ഞാലിക്കുട്ടി, വി.കെ ഇബ്രാഹിംകുഞ്ഞ്, അനൂപ് ജേക്കബ് എന്നിവര്‍ക്ക് ഇതേ ലിഫ്റ്റ് പൊട്ടി വീണ് പരുക്കേറ്റിരുന്നു.