കോഴിക്കോട്: പ്ലാസ്റ്റിക് പേനകള്‍ക്ക് വിട നല്‍കി ഇന്ന് മുതല്‍ മലബാര്‍ ക്രിസ്ത്യന്‍ കോളജ് വിദ്യാര്‍ഥികള്‍ പേപ്പര്‍ പേന ഉപയോഗിച്ച് തുടങ്ങും. പ്ലാസ്റ്റിക്കിനെതിരെയുള്ള പ്രചാരണാര്‍ഥം പേപ്പര്‍ പെന്‍ വിപ്ലവം എന്ന പേരില്‍ നടത്തിയ പരിപാടിയിലാണ് വിദ്യാര്‍ഥികള്‍ പ്ലാസ്റ്റിക് പേന ഉപേക്ഷിക്കാന്‍ തീരുമാനിച്ചത്.

കോളജിലെ ഗ്രീന്‍ കാംപസ് ഇനീഷ്യേറ്റീവ്, ഇ.ഡി ക്ലബ്ബ്, എന്‍.എസ്.എസ് എന്നിവയുടെ നേതൃത്വത്തിലാണ് പരിപാടി സംഘടിപ്പിച്ചത്. ഇതിന്റെ ഭാഗമായി ചൊവ്വാഴ്ച കോളജിലെ 1800ഓളം വിദ്യാര്‍ഥികള്‍, മാനേജര്‍, പ്രിന്‍സിപ്പല്‍, അധ്യാപകര്‍, ഓഫീസ് ജീവനക്കാര്‍, സെക്യൂരിറ്റി സ്റ്റാഫുകള്‍, കുടുംബശ്രീ എന്നിവരാണ് ഒരേ സമയം പേപ്പര്‍ പേന നിര്‍മിച്ച് വിപ്ലവം സൃഷ്ടിച്ചത്.

നേരത്തെ പരിശീലനം ലഭിച്ച വിദ്യാര്‍ഥികളുടെ നേതൃത്വത്തില്‍ അതാത് ക്ലാസുകളിലെത്തിയാണ് പേന നിര്‍മാണം നടന്നത്. പ്രിന്‍സിപ്പല്‍ ഡോ. ഗോഡ്വിന്‍ സാംറാജ്, കോളജ് മാനേജര്‍ ജോസഫ് ഡാനിയേല്‍, ഐ.ക്യു.എ.സി കോര്‍ഡിനേറ്റര്‍ ഡോ.ശ്രീജിത്ത് എം.നായര്‍, പി.ടി.എ സെക്രട്ടറി ഹരിദാസന്‍, പ്രോഗ്രാം കോര്‍ഡിനേറ്റര്‍ ഡോ.പി.എസ് ഷീബ, ഡോ.ഷിനോയ് ജെസിന്ത്, ഡോ.ധരനാജ്, സായിഗീത, ഡോ.ബിജു മാത്യു, മിഥുല മോഹന്‍, ഡിന്‍സി ഡേവിഡ് നേതൃത്വം നല്‍കി.