കൊല്ലം: നാഗര്‍കോവിലില്‍നിന്നു വര്‍ക്കല, പരവൂര്‍, ഇടവ തുടങ്ങിയ ടൂറിസ്റ്റ് കേന്ദ്രങ്ങളില്‍ ടൂറിസ്റ്റുകള്‍ക്കും യുവാക്കള്‍ക്കും വില്‍പന നടത്തുന്നതിനായി കടത്തിക്കൊണ്ടുവന്ന ഒന്നേകാല്‍ കിലോ കഞ്ചാവുമായി മധ്യവയസ്‌കനെ കൊല്ലം എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഐ. നൗഷാദിന്റെ നേതൃത്വത്തില്‍ കൊല്ലം റെയില്‍വേ സ്റ്റേഷന് സമീപത്തുനിന്നു അറസ്റ്റ് ചെയ്തു. വര്‍ക്കല ജനാര്‍ദ്ദനപുരം ദേശത്ത് കാഞ്ഞികവിളാകം വീട്ടില്‍ സോമകുമാറിനെയാണ് അറസ്റ്റ് ചെയ്തത്. 10,000 രൂപക്ക് ഏജന്റ് വഴി ഒന്നര കിലോ കഞ്ചാവ് വാങ്ങി ട്രെയിന്‍മാര്‍ഗം കൊല്ലത്തെത്തി സ്ഥിരം ഇടപാടുകാര്‍ക്ക് വില്‍പന നടത്തുന്നതിന് ബസ് കാത്തുനിന്നപ്പോഴാണ് പിടിക്കപ്പെട്ടത്. 16 വയസുള്ള കുട്ടികളും പ്രായമുള്ളവരും എല്ലാം തന്റെ ഇടപാടുകാരാണെന്ന് പ്രതി പൊലിസിനോട് പറഞ്ഞു. രണ്ട് മുതല്‍ മൂന്ന് ഗ്രാം വരെയുള്ള ചെറുപൊതികളാക്കി പൊതി ഒന്നിന് 300 രൂപാ നിരക്കിലാണ് വില്‍പന നടത്തുന്നത്. വര്‍ക്കല കേന്ദ്രീകരിച്ചാണ് ഇപ്പോള്‍ കൂടുതലും കച്ചവടം നടത്തുന്നത്.
നാഗര്‍കോവിലില്‍ ഏജന്റുമാരാണ് ഇയാള്‍ക്ക് കഞ്ചാവ് എത്തിക്കുന്നത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
എക്‌സൈസ് ഇന്‍സ്‌പെക്ടര്‍ ശ്യാംകുമാര്‍, പ്രിവന്റീവ് ഓഫിസര്‍ ഷിഹാബുദ്ദീന്‍, സിവില്‍ എക്‌സൈസ് ഓഫിസര്‍മാരായ എവേഴ്‌സണ്‍ ലാസര്‍, ദിലീപ്കുമാര്‍, അനീഷ്, രഞ്ജിത്, ലാല്‍, വിഷ്ണുരാജ്, അഖില്‍, ജ്യോതി, രാഹുല്‍ പങ്കെടുത്തു.