ന്യൂഡല്‍ഹി: ഇന്ത്യയുടെ സാമ്പത്തിക തകര്‍ച്ചയില്‍ കടുത്ത ആശങ്ക അറിയിച്ച ഐ.എം.എഫിനും സാമ്പത്തിക വിദഗ്ധ ഗീതാ ഗോപിനാഥിനുമെതിരേ കേന്ദ്ര സര്‍ക്കാറിന്റെ ആക്രമണമുണ്ടാകുമെന്ന മുന്നറിയിപ്പുമായി മുന്‍ ധനകാര്യ മന്ത്രിയും മുതിര്‍ന്ന കോണ്‍ഗ്രസ് നേതാവുമായ പി. ചിദംബരം.
നോട്ട് നിരോധനത്തെ തുടക്കത്തിലേ തന്നെ തള്ളിപ്പറഞ്ഞ സാമ്പത്തികവിദഗ്ധയാണ് ഐ.എം.എഫ് മേധാവി ഗീത ഗോപിനാഥ്. ഐ.എം.എഫിനും ഗീതാ ഗോപിനാഥിനും എതിരേ കേന്ദ്രമന്ത്രിമാരുടെ ഭാഗത്തുനിന്നുണ്ടാവുന്ന ആക്രമണത്തിന് നാം തയ്യാറായിരിക്കണമെന്നാണ് ഞാന്‍ കരുതുന്നത്- ചിദംബരം പരിഹാസത്തോടെ പറഞ്ഞു.
ഈ സാമ്പത്തികവര്‍ഷത്തില്‍ ഇന്ത്യയുടെ വളര്‍ച്ചാനിരക്ക് 4.8 ശതമാനമായി കുറയുമെന്നും ജി.ഡി.പിയുടെ കാര്യത്തില്‍ പ്രതീക്ഷിച്ച മുന്നേറ്റമുണ്ടാവില്ലെന്നുമാണ് അന്താരാഷ്ട്ര നാണയ നിധിയുടെ റിപ്പോര്‍ട്ട്. 2019-2020 സാമ്പത്തിക വര്‍ഷത്തില്‍ 6.1 ശതമാനം വളര്‍ച്ചാ നിരക്ക് ഉണ്ടാകുമെന്നായിരുന്നു കഴിഞ്ഞ വര്‍ഷം ഒക്ടോബറില്‍ ഐ.എം.എഫിന്റെ റിപ്പോര്‍ട്ട്. പക്ഷെ ഇത്തരത്തില്‍ പ്രതീക്ഷിച്ച വളര്‍ച്ച ഉണ്ടാകില്ലെന്നാണ് പുതിയ റിപ്പോര്‍ട്ട് പറയുന്നത്. ആറ് വര്‍ഷത്തിലെ ഏറ്റവും കുറഞ്ഞ വളര്‍ച്ചാ നിരക്കാണ് 2019 ജൂലൈ- സെപ്തംബറില്‍ രേഖപ്പെടുത്തിയത്.