സിയോള്‍: ഉത്തരകൊറിയന്‍ എകാധിപതി കിം ജോങ് ഉന്നിന്റെ സഹോദരന്‍ കിം ജോങ് നാമിന്റെ മരണത്തിന് കാരണമായത് രാസാവസ്തുവെന്ന് മലേഷ്യന്‍ പൊലിസ്. ഞെരമ്പുകളെ ബാധിക്കുന്ന ഇത് യുദ്ധത്തിനായുള്ള രാസായുധ നിര്‍മാണത്തില്‍ വരെ ഉപയോഗിക്കുന്നതാണെന്നാണ് പൊലിസിന്റെ കണ്ടെത്തല്‍. വി.എക്‌സ് നെര്‍വ് ഏജന്റ് എന്ന രാസവസ്തുവാണ് ഇതെന്ന് മലേഷ്യയ്‌ലെ കെമിസ്ട്രി ഡിപ്പാര്‍ട്ട്‌മെന്റ് സ്ഥിരീകരിച്ചതായി ഇന്‍സ്‌പെക്ടര്‍ ജനറല്‍ ഒഫ് പൊലിസ് പറഞ്ഞു.
ശക്തമായ നാശത്തിനിടയാക്കുന്ന രാസവസ്തുവായാണ് വി.എക്‌സ് നെര്‍വ് ഏജന്റിനെ യു.എന്‍ കണക്കാക്കുന്നത്.
നാഡികളുമായി ബന്ധപ്പെട്ട വി.എക്‌സ് എജന്റ് ത്വക്കിലൂടെയാണ്ശരീരത്തിലെത്തുന്നത്. ഇതിന്റെ സാന്നിധ്യം ശരീരത്തിന് കടുത്ത അസ്വസ്ഥതകള്‍ക്ക് കാരണമാവും. ശരീരത്തിലെത്തിയ രാസവസ്തുവിന്റെ തോതനുസരിച്ച് നിമിഷങ്ങള്‍ക്കകം തന്നെ മരണം സംഭവിക്കാം.
നാമിന്റെ മുഖത്ത് ഈ രാസവസ്തുവാകാം സ്‌പ്രേ ചെയ്തതെന്നാണ് പൊലിസ് നിഗമനം. തങ്ങളുടെ ശരീരത്തില്‍ ഇത് ബാധിക്കാതിരിക്കാന്‍ യുവതികള്‍ കയ്യുറ ധരിച്ചിട്ടുണ്ടാവാമെന്നും
പൊലിസ് വിലയിരുത്തുന്നു.
ഫെബ്രുവരി 13നാണ് നാം ആക്രമണത്തിനിരയായത്. തന്നെ സമീപിച്ച് സ്ത്രീകള്‍ തന്റെ മുഖത്ത് രാസവസ്തു സ്‌പ്രേ ചെയ്തതായി മരണത്തിന് മുമ്പ് കിം ജോങ് നാം പറഞ്ഞിരുന്നു. നാമിനെ ആക്രമിക്കുന്നതിന്റെ സി.സി.ടി.വി ദൃശ്യങ്ങളിലും രാസായുധം സ്‌പ്രേ ചെയ്യുന്നതിന്റെ തളിവുകളുണ്ട്.