കൊണ്ടോട്ടി: നഗരസഭയുടെ ആരോഗ്യകേന്ദ്രത്തില്‍ ഡോക്ടറില്ലാത്തത് രോഗികളെ വലക്കുന്നു. മുസ്‌ലിയാരങ്ങാടിയില്‍ ദേശീയ ആരോഗ്യദൗത്യം പദ്ധതിയില്‍ ആരംഭിച്ച ആശുപത്രിയിലാണ് ഡോക്ടറില്ലെന്ന പരാതിയുയര്‍ന്നത്. ഇവിടെ നിശ്ചയിച്ചിരിക്കുന്ന ഡോക്ടര്‍ കൂടുതല്‍ ദിവസങ്ങളിലും അവധിയിലായതിനാല്‍ ഈ സമയത്ത് എത്തുന്ന രോഗികള്‍ മടങ്ങിപോകേണ്ട ഗതികേടാണ്. ഉച്ചക്ക് 12 മുതല്‍ വൈകീട്ട് ആറുവരെയാണ് ആശുപത്രി പ്രവര്‍ത്തിക്കുക. പ്രതിദിനം നൂറിലധികം രോഗികള്‍ ഇവിടെ ചികിത്സ തേടിയെത്താറുണ്ട്.
തുടര്‍ച്ചയായി മൂന്ന് ദിവസം വരെ ഡോക്ടറില്ലാത്ത സാഹചര്യമുണ്ടായിട്ടുണ്ട്. ഡോക്ടര്‍ അവധിയെടുക്കുന്ന ദിവസങ്ങളില്‍ വേറെ ഡോക്ടറെ നിയമിക്കാന്‍ അധികൃതര്‍ നടപടി സ്വീകരിക്കണമെന്ന് ആരോഗ്യവകുപ്പ് സ്ഥിരസമിതി അധ്യക്ഷന്‍ അയ്യാടന്‍ മുഹമ്മദ് ഷാ ആവശ്യപ്പെട്ടു.