മലപ്പുറം: ഏകജാലകരീതിയിലുള്ള പ്ലസ് വണ്‍ പ്രവേശനത്തിന്റെ ട്രയല്‍ അലോട്ട്‌മെന്റ് ഫലം നാളെ പ്രസിദ്ധീകരിക്കും. ജില്ലയില്‍നിന്ന് ഓണ്‍ലൈന്‍ അപേക്ഷ നല്‍കിയ 82275 വിദ്യാര്‍ഥികളുടെ ട്രയല്‍ഫലമാണ് നാളെ പ്രസിദ്ധീകരിക്കുക. 

ട്രയല്‍ അലോട്ട്‌മെന്റ് ഫലത്തോടൊപ്പം വിദ്യാര്‍ഥികള്‍ ചെയ്യേണ്ടതു സംബന്ധിച്ച തുടര്‍ നിര്‍ദേശങ്ങളും ലഭിക്കും. പ്ലസ് വണ്‍ പ്രവേശനം തേടുന്ന ജില്ലയിലെ വിഭിന്ന ശേഷിക്കാരായ വിദ്യാര്‍ഥികള്‍ വൈകല്യം തെളിയിക്കുന്ന സര്‍ട്ടിഫിക്കറ്റ് ജില്ലാതല കൗണ്‍സിലിംഗ് സമിതിക്കു മുന്നില്‍ 14നകം സമര്‍പ്പിക്കേണ്ടതുണ്ട്. തുടര്‍ന്നു ലഭിക്കുന്ന റഫറന്‍സ് നമ്പര്‍ അപേക്ഷയിലുള്‍പ്പെടുത്തണം.

ട്രയല്‍ അലോട്ട്‌മെന്റ് ഫലം നാളെ പുറത്തുവരുമെങ്കിലും തുടര്‍ന്നും വിദ്യാര്‍ഥികള്‍ക്ക് അപേക്ഷകളിലെ തെറ്റുതിരുത്താന്‍ അവസരം ഉണ്ട്. തിരുത്തലിനുള്ള അപേക്ഷകള്‍ 14 നു വൈകുന്നേരം നാലിനുമുമ്പ് ആദ്യം അപേക്ഷ സമര്‍പ്പിച്ച സ്‌കൂളുകളിലാണു സമര്‍പ്പിക്കേണ്ടത്. അതേസമയം തെറ്റായ വിവരങ്ങള്‍ നല്‍കി ലഭിക്കുന്ന അലോട്ട്‌മെന്റുകള്‍ റദ്ദാക്കുമെന്ന് ഹയര്‍സെക്കന്‍ഡറി ഡയറക്ടര്‍ അറിയിച്ചു. ട്രയല്‍ അലോട്ട്‌മെന്റിനു ശേഷം വിദ്യാര്‍ഥികള്‍ വരുത്തുന്ന മാറ്റിത്തിരുത്തലുകള്‍ക്കു ശേഷം ഈ മാസം 20 നാണ് ആദ്യ അലോട്ട്‌മെന്റ് ഫലം പ്രസിദ്ധീകരിക്കുക.