പാലാ: രാമപുരം കൊണ്ടാട് ഗവ.എല്‍.പി.എസ് ശതാബ്ദിനിറവില്‍. 1916ല്‍ മാളിയേക്കല്‍ ആശാന്‍ ആണ് സ്‌കൂളിന്റെ പ്രവര്‍ത്തനങ്ങള്‍ക്ക് തുടക്കം കുറിച്ചത്. ആദ്യകാലങ്ങളില്‍ ജനകീയ സമിതിയായിരുന്നു സ്‌കൂളിന്റെ പ്രവര്‍ത്തനം നടത്തിയിരുന്നത്.
രാമപുരം ഗ്രാമത്തിന്റെയും സമീപ പ്രദേശങ്ങളിലേയും സാംസ്‌കാരിക പൈതൃകത്തിന് നിദാനമായ നിലകൊണ്ട സ്‌കൂളിന്റെ വാര്‍ഷിക ആഘോഷങ്ങള്‍ ഉത്സവപ്രതീതിയോടെ ആഘോഷിക്കുകയാണ് നാട്ടുകാര്‍. 1948ല്‍ സര്‍ക്കാര്‍ സ്‌കൂള്‍ ഏറ്റെടുക്കുന്നത്. ഓലക്കെട്ടിടത്തില്‍ പ്രവര്‍ത്തിച്ച സ്‌കൂള്‍ 1995-ലാണ് കെ.എം മാണിയുടെ എം.എല്‍.എ ഫണ്ട് ഉപയോഗിച്ച് നിര്‍മിച്ച പുതിയ കെട്ടിടത്തില്‍ പ്രവര്‍ത്തനം ആരംഭിച്ചത്. നിരവധി പ്രതിഭകള്‍ക്കും കലാകാരന്‍മാര്‍ക്കും അറിവ് പകര്‍ന്ന സ്‌കൂള്‍ ഇന്നും ആയിരക്കണക്കിന് കുഞ്ഞുങ്ങള്‍ക്ക് വിദ്യയുടെ പ്രകാശം പകര്‍ന്നു നല്‍കുകയാണ്.
2016 ഫെബ്രുവരിയില്‍ ആരംഭിച്ച ശതാബ്ദി ആഘോഷത്തിന്റെ സമാപനം 26ന് വൈകിട്ട് നാലിന് നടക്കും. സമ്മേളനം കെ.എം മാണി എം.എല്‍.എ ഉദ്ഘാടനം ചെയ്യും. പഞ്ചായത്ത് പ്രസിഡന്റ് ഷൈനി സന്തോഷ് അധ്യക്ഷയാകുന്ന സമ്മേളനത്തില്‍ ജില്ലാ പഞ്ചായത്തംഗം അനിതാ രാജു, ഉഴവൂര്‍ ബ്ലോക്ക് പ്രസിഡന്റ് മോളി ലൂക്കാ, വാര്‍ഡ് അംഗങ്ങളായ ജീനസ് നാഥ്, ജാന്‍സി ഫിലിപ്പോസ്, എ.എന്‍ സുരേന്ദ്രന്‍, എം.പി ശ്രീനിവാസ് തുടങ്ങി രാഷ്ട്രീയ സാംസ്‌കാരിക രംഗത്തെ പ്രമപഖര്‍ പങ്കെടുത്തു. പൂര്‍വ വിദ്യാര്‍ഥികളുടെ കലാ പരിപാടികളും നടക്കും.