കാബൂള്‍: അഫ്ഗാനിസ്ഥാനില്‍ യാത്രാ വിമാനം തകര്‍ന്നുവീണ് മുഴുവന്‍ യാത്രക്കാരും കൊല്ലപ്പെട്ടതായി റിപ്പോര്‍ട്ട്. രാജ്യത്തിന്റെ ഔദ്യോഗിക യാത്രാ വിമാനമായ ഏരിയാന എയര്‍ലൈന്‍സാണ് ഹിന്ദുകുഷ് മലനിരകളില്‍ തകര്‍ന്നുവീണത്. 80ലധികം യാത്രികരാണ് വിമാനത്തിലുണ്ടായിരുന്നതെന്നാണ് പ്രാഥമിക റിപ്പോര്‍ട്ട്. 

അഫ്ഗാനിലെ ഗസ്‌നി പ്രവിശ്യയില്‍ താലിബാന്‍ നിയന്ത്രണത്തിലുള്ള ഭാഗത്താണ് വിമാനം തകര്‍ന്നു വീണതെന്നാണ് കരുതപ്പെടുന്നത്. 

ഗസ്‌നി മേഖലയില്‍ വിമാനം തകര്‍ന്നു വീണിട്ടുണ്ടെന്നും കൂടുതല്‍ അന്വേഷണങ്ങള്‍ നടത്തിവരികയാണെന്നും പ്രസിഡന്റ് അഷ്‌റഫ് ഗനിയുടെ ഓഫിസിനെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. പ്രദേശത്തെ ഗവര്‍ണറുടെ ഓഫിസും വാര്‍ത്ത സ്ഥിരീകരിച്ചിട്ടുണ്ട്. വിമാനം ഗസ്‌നിയില്‍ നിന്നും ഹെറാത്തിലേക്കുള്ള യാത്രയിലായിരുന്നു. 

മരിച്ചവരില്‍ പൈലറ്റിനെ മാത്രമേ തിരിച്ചറിയാന്‍ പറ്റുന്നുള്ളൂവെന്നും കണ്ടിട്ട് അഫ്ഗാന്‍കാരനാണെന്ന് തോന്നുന്നില്ലെന്നും സൈന്യം അറിയിച്ചു. അതേസമയം അഫ്ഗാന്‍ ഔദ്യോഗിക യാത്രാ വിമാനമാണ് അപകടത്തില്‍ പെട്ടതെന്ന വാര്‍ത്ത ഏരിയാന കമ്പനി സി.ഇ.ഒ മിര്‍വായിസ് മിര്‍സാക്വല്‍ തള്ളി.