നിലമ്പൂര്‍: ചാലിയാര്‍ പഞ്ചായത്തിലെ എരഞ്ഞിമങ്ങാടില്‍ വീടിനകത്ത് കയറിയ പുല്ലാനി മൂര്‍ഖനെ പാമ്പുപിടുത്തക്കാരാനായ സി.ടി കുഞ്ഞാപ്പ പിടികൂടി വനംവകുപ്പിന് കൈമാറി. മാവുങ്ങല്‍ അബ്ദുല്‍ നാസറിന്റെ വീട്ടിനകത്ത് കയറിക്കൂടിയ അഞ്ചരയടി നീളമുള്ള മൂര്‍ഖനെയാണ് പിടികൂടിയത്.
കൂടാതെ കുറ്റിക്കാട്ടില്‍ റുഖിയയുടെ വീട്ടിലെ കോഴിക്കൂടില്‍ കയറി കോഴികളെ അകത്താക്കിയ മൂര്‍ഖനെയും പിടികൂടി. നാട്ടുകാരും വനംവകുപ്പ് ഉദ്യോഗസ്ഥരും വിളിച്ചാല്‍ 24 മണിക്കൂറും സേവനവുമായി കുഞ്ഞാപ്പ എത്തുന്നതാണ് ചാലിയാര്‍ പഞ്ചായത്ത് നിവാസികള്‍ക്ക് ആശ്വാസം. ഏഴു പെരുമ്പാ മ്പുകള്‍ ഉള്‍പ്പെടെ ഇതിനോടകം 230 പാമ്പുകളെയാണ് പിടികൂടി വനത്തില്‍ ഉപേക്ഷിച്ചത്.

മൊബൈല്‍ ഫോണ്‍ കുറഞ്ഞ നിരക്കില്‍ നല്‍കുമെന്ന

പേരില്‍ തട്ടിപ്പ് നടത്തിയതായി പരാതി

എടക്കര: പ്രമുഖ മൊബൈല്‍ കമ്പനിയുടെ ഫോണ്‍ കുറഞ്ഞ നിരക്കില്‍ നല്‍കുമെന്ന പേരില്‍ തട്ടിപ്പ് നടത്തിയതായി പരാതി.
മുണ്ടയിലെ ചിത്രം വള്ളി കുഞ്ഞുമുഹമ്മദിന്റെ പണമാണ് തട്ടിയത്. മാര്‍ക്കറ്റില്‍ ആറായിരം രൂപയോളം വിലവരുന്ന ഫോണ്‍ 3500 രൂപക്ക് നല്‍കാമെന്ന് ഫോണിലൂടെ പറഞ്ഞാണ് ധരിപ്പിച്ചിരുന്നത്. ഇതിന്റെ അടിസ്ഥാനത്തില്‍ ഓര്‍ഡര്‍ നല്‍കുകയും ചെയ്തു. എന്നാല്‍ കഴിഞ്ഞ ദിവസം പോസ്റ്റ് ഓഫിസില്‍ പാര്‍സലെത്തി പണമടച്ച് യുവാവ് പാര്‍സല്‍ പൊട്ടിച്ചപ്പോളാണ് തട്ടിപ്പാണമെന്ന് മനസിലാകുന്നത്. ബെല്‍റ്റും പേഴ്‌സുമാണ് പാര്‍സലില്‍ ഉണ്ടായിരുന്നത്. കുഞ്ഞുമുഹമ്മദ് വഴിക്കടവ് സ്റ്റേഷനിലും തപാല്‍ ഓഫിസിലും പരാതി നല്‍കി.