വീടുകള്‍ക്ക് നേരെയും ആക്രമണം
ബൈക്കുകള്‍ കത്തിച്ചു
വല്ലപ്പുഴ: പൊട്ടച്ചിറയിന്‍ സി.പി.എം, ബി.ജെ.പി പ്രവര്‍ത്തകര്‍ തമ്മില്‍ നടന്ന സംഘര്‍ഷത്തില്‍ നിരവധി പേര്‍ക്ക് പരുക്കേറ്റു. ശനിയാഴ്ച രാത്രിയിലാണ് പൊട്ടച്ചിറയിലും എഴുവന്തലയിലുമായി അക്രമണ പരമ്പര അരങ്ങേറിയത്. വിദ്യാര്‍ഥി സംഘടനകള്‍ തമ്മിലുള്ള അസ്വാരസ്യമാണ് സംഘര്‍ഷത്തിലേക്ക് നയിച്ചതെന്ന് പറയപ്പെടുന്നു.
രാത്രി ഏഴു മുതല്‍ 12വരെ നടന്ന അക്രമണത്തില്‍ ആറു സി.പി.എം പ്രവര്‍ത്തകര്‍ക്ക് പരുക്കേറ്റു. രണ്ട് സി.പി.എം പ്രവര്‍ത്തകരുടെയും, രണ്ട് ബി.ജെ.പി പ്രവര്‍ത്തകരുടെയും വീടുകള്‍ക്ക് നേരെയും വായനശാലക്ക് നേരെയും അക്രമണമുണ്ടായി. സി.പി.എം പ്രവര്‍ത്തകരുടെ എട്ട് ബൈക്കുകള്‍ കത്തി നശിച്ചു. പരുക്കേറ്റവരെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
പി.കെ ശശി എം.എല്‍.എ ഉള്‍പെടെയുള്ള നേതാക്കള്‍ സംഭവസ്ഥലം സന്ദര്‍ശിച്ചു. സംഘര്‍ഷാവസ്ഥ കണക്കിലെടുത്ത് സ്ഥലത്ത് പൊലിസ് ക്യാംപ് ചെയ്യുന്നുണ്ട്.