പോത്തന്‍കോട്: മാനസികാസ്വാസ്ഥ്യമുള്ള പട്ടികജാതി യുവാവിനെ പൊലിസ് ക്രൂരമായി മര്‍ദിച്ചതായി പരാതി. മഞ്ഞമല കല്ലൂര്‍ അടപ്പിനകത്ത് പണയില്‍ വീട്ടില്‍ വിനോദി(38)നാണ് മര്‍ദനമേറ്റത്. മുതുകില്‍ ബൂട്ടുകൊണ്ട് ചവിട്ടുകയും കാല്‍പാദത്തില്‍ ചൂരല്‍കൊണ്ട് അടിക്കുകയും ചെയ്തുവെന്നാണ് പരാതി. വിനോദ് നാലുദിവസമായി ജനറല്‍ ആശുപത്രിയില്‍ ചികിത്സയിലാണ്. വിനോദിന്റെ അമ്മ ശാന്തയും ബന്ധുക്കളും ഉന്നത പൊലിസുദ്യോഗസ്ഥര്‍ക്ക് പരാതി നല്‍കിയിട്ടുണ്ട്.
ബന്ധുക്കള്‍ പറയുന്നത്: വിനോദിന്റെ പിതാവ് ഇരുപത് ദിവസം മുമ്പ് മരണപ്പെട്ടിരുന്നു. മരണാനന്തര ചടങ്ങുകള്‍ നടത്തുന്നതിനുള്ള പണം കടം വാങ്ങുന്നതിന് കഴിഞ്ഞ വെളളിയാഴ്ച രാത്രി വിനോദ് അയല്‍വീട്ടിലേക്കു പോയി. ഉടനെ വിനോദ് നിലവിളിച്ചു കൊണ്ട് തിരികെ ഓടുകയായിരുന്നുവെന്ന് സഹോദരി വിജിത പറഞ്ഞു. തൊട്ടു പുറകെ അയല്‍വാസി റിട്ട. പൊലിസ്് ഉദ്യോഗസ്ഥനും സഹോദരനും ഒപ്പം രണ്ടുപേരും ഉണ്ടായിരുന്നു. ഇവരുടെ കൈയില്‍ ആയുധങ്ങളുമുണ്ടായിരുന്നു. അന്നു രാത്രി പൊലിസ് എത്തി വിവരങ്ങള്‍ ചോദിച്ചു മടങ്ങി.
ബുധനാഴ്ച രാത്രി മൂന്നു പൊലീസുകാര്‍ വീട്ടിലെത്തി അസഭ്യം പറഞ്ഞ് വീട്ടിനുള്ളില്‍ കടന്ന് വിനോദിനെ സ്റ്റേഷനിലേക്ക് കൊണ്ടുപോയി. ഈ സമയം വീട്ടില്‍ അമ്മ ശാന്തയും വിജിതയുടെ മകളും മാത്രമെ വീട്ടില്‍ ഉണ്ടായിരുന്നുള്ളൂ. അമ്മയും പിന്നാലെ സ്റ്റേഷനില്‍ എത്തിയെങ്കിലും രാത്രി പതിനൊന്നരയോടെ അമ്മയെ പൊലീസ് വീട്ടിലേക്കു തിരിച്ചയച്ചു.
അടുത്ത ദിവസം ഉച്ചയ്ക്ക് തീരെ അവശനായാണ് വിനോദ് വീട്ടിലെത്തിയത്. ഇവിടെ കണ്ടു പോകരുതെന്നും എല്ലാകേസുകളും തലയില്‍ കെട്ടിവയ്ക്കുമെന്നും എസ്‌ഐ ഭീഷണിപ്പെടുത്തിയെന്ന് വിനോദ് വീട്ടുകാരോട് പറഞ്ഞു. അവശനിലയിലായതിനാല്‍ ഉടനെ വീട്ടുകാര്‍ ജനറല്‍ ആശുപത്രിയില്‍ പ്രവേശിപ്പിച്ചു. ഇതിനിടെ സ്ഥലം എസ്.ഐ കെ. ആര്‍ ബിജു സ്ഥലം മാറി പോയി. മദ്യപിച്ചു ബഹളമുണ്ടാക്കിയതിനാണ് പിടികൂടിയെതെന്നാണ് പുതിയ എസ്.ഐ പറയുന്നത്.
സമീപമുള്ള വസ്തു കൈവശമാക്കാന്‍ അയല്‍ക്കാരനായ റിട്ട. പൊലിസ് ഉദ്യോഗസ്ഥന്‍ വളരെ നാളായി ശ്രമിക്കുന്നതായും അതിനു കഴിയാതെ വന്നതിനാലാണ് വിനോദിനെ കള്ള കേസില്‍കുടുക്കാന്‍ ശ്രമിക്കുന്നതെന്ന് ബന്ധുക്കള്‍ പറയുന്നു.ഇതു സംബന്ധിച്ച് മനുഷ്യാവകാശ കമ്മിഷനിലും പരാതി നല്‍കുമെന്നും ബന്ധുക്കള്‍ പറഞ്ഞു.