തിരുവനന്തപുരം: ചീമേനിയിലെ തുറന്ന ജയിലില്‍ ഗോപൂജ നടത്തിയ ഉദ്യോഗസ്ഥരുടെ നടപടി ഗുരുതരമായ നിയമലംഘനമാണെന്ന് മുഖ്യമന്ത്രി പിണറായി വിജയന്‍. പരിശീലനം പൂര്‍ത്തിയാക്കിയ ജയില്‍ വാര്‍ഡന്‍മാരുടെ പാസിങ്ഔട്ട് പരേഡില്‍ സല്യൂട്ട് സ്വീകരിച്ച് സംസാരിക്കുകയായിരുന്നു അദ്ദേഹം.
ഈശ്വരനെ അംഗീകരിക്കുന്നോ ഇല്ലയോ എന്നൊന്നും സര്‍ക്കാരിന് പ്രശ്‌നമില്ല. നിയമവാഴ്ചയെ അംഗീകരിക്കുന്നുണ്ടോയെന്നതാണ് പ്രശ്‌നം. നിയമവാഴ്ചയെ അംഗീകരിച്ചേ മുന്നോട്ടു പോകാന്‍ പാടുള്ളൂ. ചീമേനിയില്‍ നടന്നത് നിയമലംഘനമാണെന്നതില്‍ സംശയമില്ല. ആരാധനയെ എതിര്‍ക്കുന്നില്ല. പക്ഷെ, ആരാധിക്കുന്ന ഇടം ഏതാണെന്നതാണ് പ്രശ്‌നമെന്നും അദ്ദേഹം പറഞ്ഞു. കഴിഞ്ഞ ദിവസമാണ് ചീമേനി തുറന്ന ജയിലില്‍ സൂപ്രണ്ടിന്റെ സാന്നിധ്യത്തില്‍ കര്‍ണാടകയില്‍ നിന്നെത്തിച്ച പശുക്കളെ പൂജ നടത്തിയത്. ജയില്‍ മേധാവിയുടെ അനുമതിയില്ലാതെ നടന്ന ഗോപൂജയെയാണ് മുഖ്യമന്ത്രി വിമര്‍ശിച്ചത്.
എന്നാല്‍, ജയിലുകളില്‍ അനുവാദമില്ലാതെ ഉപഹാരങ്ങള്‍ വാങ്ങുന്നത് കര്‍ശനമായി നിരോധിച്ചിട്ടുള്ളതാണ്. ഇത് ലംഘിച്ചാണ് പശുക്കളെ പൂജനടത്തി ഏറ്റുവാങ്ങിയത്. ഇതിനെതിരേ ജയില്‍ ഡി.ജി.പി അന്വേഷണത്തിന് ഉത്തരവിട്ടിരുന്നു.