വാഷിങ്ടണ്‍: സിറിയയില്‍നിന്ന് അമേരിക്കന്‍ സൈന്യം പിന്‍മാറ്റം തുടങ്ങിയെന്ന വാര്‍ത്തകള്‍ക്ക് പിന്നാലെ വിശദീകരണവുമായി അധികൃതര്‍. സൈനിക പിന്‍മാറ്റം തുടങ്ങിയിട്ടില്ലെന്നും സൈനിക ഉപകരണങ്ങള്‍ തിരിച്ചെത്തിക്കുന്ന നടപടിയാണ് ഇപ്പോള്‍ നടക്കുന്നതെന്നുമാണ് അമേരിക്കന്‍ സൈന്യത്തിന്റെ വിശദീകരണം. സിറിയയില്‍നിന്ന് അമേരിക്കന്‍ സൈന്യത്തെ പിന്‍വലിക്കുമെന്ന പ്രസിഡന്റ് ഡൊണാള്‍ഡ് ട്രംപിന്റെ പ്രസ്താവനയ്ക്കു പിന്നാലെ സൈന്യം പിന്‍മാറ്റം തുടങ്ങിയെന്നായിരുന്നു കഴിഞ്ഞ ദിവസം വാര്‍ത്ത പുറത്തുവന്നത്.

ട്രംപിന്റെ അപ്രതീക്ഷിത പ്രഖ്യാപനത്തിന് ഒരു മാസത്തിനു ശേഷമാണ് സൈന്യം പിന്മാറ്റം തുടങ്ങിയതായ വാര്‍ത്ത പുറത്തുവന്നത്. എന്നാല്‍ ട്രംപിന്റെ പ്രഖ്യാപനം നേരത്തേതന്നെ വലിയ വിവാദങ്ങള്‍ക്കു കാരണമായിരുന്നു. ഇസ്‌റാഈല്‍ അടക്കമുള്ള സഖ്യകക്ഷികള്‍ സൈനിക പിന്‍മാറ്റത്തോടുള്ള എതിര്‍പ്പറിയിച്ചതോടെ കഴിഞ്ഞയാഴ്ച അമേരിക്കന്‍ സുരക്ഷാ ഉപദേഷ്ടാവ് ജോണ്‍ ബോള്‍ട്ടന്‍ ഇസ്‌റാഈല്‍ സന്ദര്‍ശിക്കുകയും സഖ്യരാഷ്ട്രങ്ങളുടെ സുരക്ഷ ഉറപ്പാക്കിയതിനു ശേഷമേ സൈനിക പിന്‍മാറ്റം ഉണ്ടാകൂവെന്ന് ഉറപ്പുനല്‍കുകയും ചെയ്തിരുന്നു.

ഇതിനു പിന്നാലെയാണ് പുതിയ വാര്‍ത്തകള്‍ പുറത്തുവന്നത്. സൈന്യത്തെ പിന്‍വലിക്കാനുള്ള ട്രംപിന്റെ തീരുമാനത്തില്‍ പ്രതിഷേധിച്ച് സിറിയയിലെ സഖ്യസൈന്യത്തിലെ അമേരിക്കന്‍ സ്ഥാനപതി ബ്രെറ്റ് മെക്കര്‍ഗ്, പ്രതിരോധ സെക്രട്ടറി ജിം മാറ്റിസ്, പെന്റഗണ്‍ പ്രതിരോധ വകുപ്പ് സ്റ്റാഫ് മേധാവി കെവിന്‍ സ്വീനി തുടങ്ങിയ ഉന്നത ഉദ്യോഗസ്ഥര്‍ രാജിവച്ചിരുന്നു.
ഐ.എസ് വിരുദ്ധ പോരാട്ടത്തിനായി അമേരിക്ക രൂപംകൊടുത്ത കംപൈന്‍ഡ് ജോയിന്റ് ടാസ്‌ക് ഫോഴ്‌സ്-ഓപറേഷന്‍ ഇന്‍ഹെറന്റ് റിസോള്‍വ് (സി.ജെ.ടി.എഫ്-ഒ.ഐ.ആര്‍) എന്ന പേരിലറിയപ്പെടുന്ന സൈന്യത്തെ പിന്‍വലിക്കുമെന്നാണ് ട്രംപ് പ്രഖ്യാപിച്ചിരുന്നത്. ഐ.എസിനെ തുരത്തിയെന്ന അവകാശവാദത്തോടെയായിരുന്നു ഈ പ്രഖ്യാപനം. എന്നാല്‍, സിറിയയില്‍നിന്നു സൈന്യത്തെ പിന്‍വലിക്കുന്നതു മേഖലയില്‍ ഇറാനു ശക്തിപകരുന്ന നീക്കമാകുമെന്നു വ്യക്തമാക്കി ഇസ്‌റാഈല്‍ അടക്കമുള്ള രാജ്യങ്ങള്‍ രംഗത്തെത്തുകയായിരുന്നു.

സിറിയയില്‍ കുര്‍ദ് വിമതരായ സിറിയന്‍ ഡെമോക്രാറ്റിക് ഫോഴ്‌സുമായി സഹകരിച്ചാണ് സഖ്യസേന പോരാട്ടം നടത്തിയിരുന്നത്. ഇവിടെനിന്ന് ഐ.എസ് ഭീകരരെ തുരത്തി നിയന്ത്രണം കുര്‍ദുകള്‍ ഏറ്റെടുത്തിരുന്നു. പിന്നീട് കുര്‍ദുകള്‍ക്കെതിരേ തുര്‍ക്കി സൈനിക നടപടി ആരംഭിച്ചതോടെ ഇവരെ ചെറുക്കാനും സഖ്യസേന സഹായിച്ചു. സഖ്യസേനാ പിന്മാറ്റത്തെ തുടര്‍ന്നു മേഖലയുടെ നിയന്ത്രണം കുര്‍ദുകള്‍ സര്‍ക്കാര്‍ അനുകൂല സേനയ്ക്കു കൈമാറിയിട്ടുണ്ട്.