അങ്ങാടിപ്പുറം: ഏറാന്‍തോട്, വലമ്പൂര്‍ റോഡില്‍ നിന്നു വെടിയുണ്ട കണ്ടെത്തി. അങ്ങാടിപ്പുറം റെയില്‍വേ ഗേറ്റിനടുത്തുള്ള സോപാനം ഹോട്ടലിനരികിലെ റോഡിന്റെ വശത്തു നിന്നാണ് വെടിയുണ്ട കണ്ടെടുത്തത്.
ഇന്നലെ ഉച്ചയോടെ റോഡരികില്‍ സ്വര്‍ണനിറത്തില്‍ തിളങ്ങുന്നത് ശ്രദ്ധയില്‍പ്പെട്ട സമീപവാസികളാണ് വെടിയുണ്ട കണ്ടത്. സംശയം തോന്നിയതോടെ ഇവര്‍ പൊലിസില്‍ വിവരമറിയിക്കുകയായിരുന്നു. സംഭവത്തെ തുടര്‍ന്ന് പെരിന്തല്‍മണ്ണ സി.കെ സാജു കെ അബ്രഹാമിന്റെ നേതൃത്വത്തിലുള്ള പൊലിസ് ഉദ്യോഗസ്ഥര്‍ സ്ഥലത്തെത്തി. വെടിയുണ്ട വിശദമായ പരിശോധനക്കായി മലപ്പുറം സായുധ പൊലിസിലെ ആര്‍മറി വിഭാഗത്തിന് കൈമാറിയിട്ടുണ്ട്. പരിശോധനാ ഫലം ലഭിച്ചതിനു ശേഷം കൂടുതല്‍ അന്വേഷണം നടത്തുമെന്ന് സി.ഐ പറഞ്ഞു.