ജോധ്പൂര്‍: രാജസ്ഥാനിലെ ജോധ്പൂര്‍  വ്യോമസേനാ താവളത്തില്‍ നിന്നു പറന്നുയര്‍ന്ന യുദ്ധവിമാനം മിഗ് 27 തകര്‍ന്നുവീണു. അപകടത്തില്‍ പൈലറ്റ് ഉള്‍പ്പടെ രണ്ടുപേര്‍ നിസാരപരുക്കുകളോടെ രക്ഷപ്പെട്ടു. ഇന്നലെ രാവിലെ 11.30ന്  പതിവ് പരിശീലന പറക്കലിനായി വ്യോമതാവളത്തില്‍ നിന്നു പറന്നുയര്‍ന്ന ഉടനെയാണു വിമാനം തകര്‍ന്നുവീണതെന്ന്  പ്രതിരോധവകുപ്പ് പബ്ലിക് റിലേഷന്‍സ് ഓഫിസര്‍ മനീഷ് ഓഝാ അറിയിച്ചു.
വ്യോമസേനയുടെ കൈവശമുള്ള ഏറ്റവും പഴക്കമുള്ള യുദ്ധവിമാനങ്ങളിലൊന്നാണ്  റഷ്യന്‍ നിര്‍മിത  മിഗ് 27. സംഭവത്തെക്കുറിച്ച്  ഉന്നത തല അന്വേഷണത്തിന് ഉത്തരവിട്ടതായി പബ്ലിക് റിലേഷന്‍സ് ഓഫിസര്‍ അറിയിച്ചു. വിമാനത്തിലെ സുരക്ഷാ സംവിധാനം ഉപയോഗിച്ച് വിമാനം തകര്‍ന്നു വീഴുന്നതിന് മുമ്പുതന്നെ പൈലറ്റും സഹായിയും രക്ഷപ്പെട്ടതായും ബന്ധപ്പെട്ടവര്‍ അറിയിച്ചു. യന്ത്രത്തകരാറാണ് അപകടകാരണമായതെന്നാണ് പ്രാഥമിക വിവരം.