ഹാമില്‍ട്ടന്‍: ദക്ഷിണാഫ്രിക്കയ്‌ക്കെതിരായ നാലാം ഏകദിന മത്സരത്തില്‍ ന്യൂസിലന്‍ഡിന് ഏഴുവിക്കറ്റ് ജയം. ദക്ഷിണാഫ്രിക്ക ഉയര്‍ത്തിയ 280 റണ്‍സ് വിജയലക്ഷ്യം അഞ്ചോവര്‍ ശേഷിക്കെ മൂന്നു വിക്കറ്റ് മാത്രം നഷ്ടപ്പെടുത്തി നേടിയെടുക്കുകയായിരുന്നു ന്യൂസിലന്‍ഡ്. ഓപണര്‍ മാര്‍ട്ടിന്‍ ഗുപ്ടില്‍(180*) പുറത്താകാതെ നേടിയ സെഞ്ച്വറിയുടെ മികവിലായിരുന്നു കിവീസിന്റെ തകര്‍പ്പന്‍ ജയം. അഞ്ചു മത്സരങ്ങളുടെ പരമ്പരയില്‍ ജയത്തോടെ 2-2ന് ഒപ്പമെത്താനും ന്യൂസിലന്‍ഡിന് ഇതോടെ സാധിച്ചു.
മികച്ച സ്‌കോര്‍ പിന്തുടര്‍ന്ന കിവീസിന്റെ തുടക്കം മികച്ചതായിരുന്നില്ല. ഡീന്‍ ബ്രൗണ്‍ലി(4)യെ റബാദ മടക്കിയതോടെ കിവീസ് സമ്മര്‍ദത്തിലായി. കെയ്ന്‍ വില്യംസ(21)നൊപ്പം അര്‍ധസെഞ്ച്വറി കൂട്ടുകെട്ടുണ്ടാക്കി ഗുപ്ടില്‍ ടീമിനെ മത്സരത്തിലേക്ക് തിരിച്ചുകൊണ്ടുവന്നു. വില്യംസനെ താഹിര്‍ മടക്കിയെങ്കിലും റോസ് ടെയ്‌ലര്‍(66) എത്തിയതോടെ മത്സരം കിവീസിന് അനുകൂലമായി. ഇരുവരും ചേര്‍ന്ന് 180 റണ്‍സിന്റെ കൂട്ടുകെട്ടാണ് ഉണ്ടാക്കിയത്. ഗുപ്ടില്‍ 138 പന്ത് നേരിട്ട് 15 ബൗണ്ടറിയും 11 സിക്‌സറുകളും പറത്തി.
ടെയ്‌ലറുടെ ഇന്നിങ്‌സില്‍ ഏഴു ബൗണ്ടറിയും ഒരു സിക്‌സറുമുണ്ടായിരുന്നു. നേരത്തെ ദക്ഷിണാഫ്രിക്ക ബാറ്റിങ് തെരഞ്ഞെടുക്കുകയായിരുന്നു. എ.ബി ഡിവില്യേഴ്‌സ്(72*) ഫാഫ് ഡുപ്ലെസിസ്(67) ഹാഷിം അംല(40) എന്നിവര്‍ ടീമിനായി മികച്ച ബാറ്റിങ് കാഴ്ച്ചവച്ചു.