ഗൂഡല്ലൂര്‍: മുതുമലയില്‍ വളര്‍ത്താനകള്‍ ഭക്ഷ്യക്ഷാമത്തില്‍. നീലഗിരിയിലെ മുതുമല കടുവാ സങ്കേതത്തില്‍ വരള്‍ച്ച രൂക്ഷമായതോടെയാണ് ക്യാമ്പിലെ ആനകള്‍ക്കും ദുരിതമാരംഭിച്ചത്. ഭക്ഷ്യ വസ്തുക്കളുടെ ലഭ്യത കുറഞ്ഞതിനാല്‍ കടുത്ത പ്രതിസന്ധിയാണ് ഇവിടെ.
ചരിത്രത്തിലില്ലാത്ത വരള്‍ച്ച കാരണം വനമേഖലയില്‍ ചെടികളും, പുല്‍കൊടികളും ഉണങ്ങി പോയതിനാല്‍ ആനകളെ സംരക്ഷിക്കാന്‍ പാടുപെടുകയാണ് അധികൃതര്‍. ഇതിനെ തരണം ചെയ്യാന്‍ നാട്ടിന്‍പുറങ്ങളില്‍ നിന്നും പനയുടെ പട്ടയും മറ്റും ശേഖരിച്ച് ആനകള്‍ക്ക് തീറ്റ കൊടുക്കാന്‍ വനംവകുപ്പ് ശ്രമം ആരംഭിച്ചിരിക്കുകയാണ്.