മമ്പാട്: എം.ഇ.എസ് ഹയര്‍സെക്കന്‍ഡറി സ്‌കൂള്‍ പത്താംതരം വിദ്യാര്‍ഥിനിയും ഭിന്നശേഷിക്കാരിയുമായ ശബാന ആസ്മിക്ക് കൂട്ടുകാരുടെ സ്‌നേഹോപഹാരമായി മുച്ചക്ര വാഹനവും ധനസഹായവും കൈമാറി. മുച്ചക്ര വാഹനത്തിന്റെ ധനസമാഹരണത്തിനായി സ്‌കൂളിലെ കുട്ടികള്‍ വ്യത്യസ്തമായ പരിപാടിയായിരുന്നു സംഘടിപ്പിച്ചിരുന്നത്. സ്‌കൂളില്‍ വെച്ച് വിദ്യാര്‍ഥികള്‍ മമ്പാട് വാട്‌സപ്പ് കൂട്ടായ്മ, സ്റ്റാഫ് കൗണ്‍സില്‍ എന്നിവയുടെ ആഭിമുഖ്യത്തില്‍ 'ഫുഡ് ഫിയസ്റ്റ എന്ന പേരില്‍ ഫുഡ് ഫെസ്റ്റ്‌വെല്‍  സംഘടിപ്പിച്ചിരുന്നു. ഇതിന്റെ ലാഭത്തില്‍ നിന്നുമാണ് ശബാനക്ക് മുച്ചക്ര വാഹനം വാങ്ങിയത്. ബാക്കി വന്ന തുക ശബാനയുടെ തുടര്‍പഠനത്തിനായി ബാങ്കില്‍ നിക്ഷേപിക്കുകയും ചെയ്തു.
സ്‌കൂളില്‍ സംഘടിപ്പിച്ച ചടങ്ങില്‍ പി.വി അബ്ദുല്‍ വഹാബ് എം.പി വാഹനവും ചെക്കും ശബാനക്ക് കൈമാറി. ബി.എം റസാഖ് അധ്യക്ഷനായി. ഹെഡ്മിസ്ട്രസ് സാബിറ ആലുങ്കത്ത്, പി.വി അബ്ദുല്‍ ഖാദര്‍, അന്‍വര്‍ ഷാ, ആലിക്കുട്ടി, അജീഷ് എടാലത്ത്, എ. അന്‍വര്‍ എന്നിവര്‍ സംസാരിച്ചു.