ന്യൂഡല്‍ഹി: വെറും മൂന്നു മണിക്കൂറാണ് ഗുജറാത്തിലെ അഹമ്മദാബാദില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഉണ്ടാകുക. എന്നാല്‍ ഇതിന് ചെലവ് 100 കോടി രൂപയാണ്!.

ട്രംപിന്റെ വരവ് പ്രമാണിച്ച് പാതകള്‍ മോടികൂട്ടുന്നതിനും സ്വീകരണ സമ്മേളനത്തിനുമൊക്കെയായാണ് ഇത്രയും തുക ചെലവഴിക്കുന്നതെന്നു ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.

100 കോടിയിലേറെ രൂപ ഇതിനായി ചെലവാക്കുന്നുണ്ടെന്നു വ്യക്തമാക്കിയ മാധ്യമങ്ങള്‍, കൂടുതലും ചെലവാക്കുക ഗുജറാത്ത് സര്‍ക്കാരും തദ്ദേശ സ്ഥാപനങ്ങളുമാണെന്നും റിപ്പോര്‍ട്ട് ചെയ്തു.

ചെലവുകള്‍ ഇങ്ങനെ:

ട്രംപ് പോകുന്ന വഴിയില്‍ റോഡുകള്‍ റീടാര്‍ ചെയ്യാന്‍ 80 കോടി രൂപയാണ് ചെലവ്.

ട്രംപിന്റെ സുരക്ഷയ്ക്ക് വേണ്ടി മാത്രം 12-15 കോടി രൂപ.

സ്റ്റേഡിയം ഉദ്ഘാടന സമയത്തെ ഗതാഗത, റിഫ്രഷ്‌മെന്റ് ചെലവ് 7-10 കോടി രൂപ.

ഡിവൈഡറുകളില്‍ ഈന്തപ്പന നടുന്നതടക്കമുള്ള മോടി പിടിപ്പിക്കലിന് 6 കോടി രൂപ.

മോദി- ട്രംപ് റോഡ് ഷോയ്ക്കിടെ സാംസ്‌കാരിക പരിപാടിക്കായി 4 കോടി രൂപ.

Read more at: ചേരി കാണാതിരിക്കാന്‍ വഴിയിലുടനീളം മതില്‍: ട്രംപിനെ വരവേല്‍ക്കാന്‍ ഗുജറാത്ത് ഒരുങ്ങുന്നത് ഇങ്ങനെ

ട്രംപിനെ സല്‍ക്കരിക്കുന്നതില്‍ ബജറ്റൊന്നും നോക്കേണ്ടതില്ലെന്നാണ് ഗുജറാത്ത് മുഖ്യമന്ത്രി വിജയ് രൂപാണിയുടെ നിര്‍ദേശം. അഹമ്മദാബാദ് മുനിസിപ്പല്‍ കോര്‍പ്പറേഷന്‍, അഹമ്മദാബാദ് അര്‍ബന്‍ ഡെവലപ്‌മെന്റ് അതോറിറ്റികള്‍ക്കൊപ്പം സംസ്ഥാന സര്‍ക്കാരും ചേര്‍ന്നാണ് ത്വരിത ഗതിയില്‍ നടപടികളെടുക്കുന്നത്.