പുലര്‍ച്ചയിലെ ചില്ലയിലിരുന്ന്
ശബ്ദിക്കുന്ന കാക്കകളെ
ഈയിടെ അവന്‍
കല്ലെടുത്തെറിയാന്‍ ശ്രമിച്ചില്ല
അവര്‍ മുദ്രാവാക്യം വിളിക്കട്ടെ
എന്നവന്‍ കരുതി

നട്ടുച്ച വെയിലിലും നിരതെറ്റാതെ
നീങ്ങുന്ന ഉറുമ്പുകള്‍ക്കിടയില്‍
ഈയിടെ അവന്‍
വിരല്‍ വച്ച് തടഞ്ഞില്ല
അവരും പ്രതിഷേധം തുടരട്ടെ
എന്നവന്‍ കരുതി

രാവില്‍ പ്രകാശം തേടിയിറങ്ങിയ
പ്രാണികള്‍ തന്റെമേല്‍ വീണപ്പോഴും
ഈയിടെ അവന്‍
തട്ടിമാറ്റാന്‍ ശ്രമിച്ചില്ല
അവര്‍ പൊലിസിന്‍ ലാത്തി
വീശലില്‍ മറിഞ്ഞ് വീണതാവും
എന്നവന്‍ കരുതി