ധാക്ക: കൈകാലുകള്‍ മരത്തൊലി പോലെ വളരുന്നതിനാല്‍ ട്രീ മാന്‍ എന്ന് വിളിക്കപ്പെടുന്ന ബംഗ്ലാദേശുകാരന്‍ അബുല്‍ ബജേന്ദര്‍ 25 ശസ്ത്രക്രിയകള്‍ നടത്തിയിട്ടും അപൂര്‍വജനിത രോഗത്തിന് മാറ്റമില്ല. തൊലി വീണ്ടും വളരുന്നതിനാല്‍ ഉടന്‍ ശസ്ത്രക്രിയ വേണമെന്നാണ് ഡോക്ടര്‍മാര്‍ 28 കാരനായ ബജേന്ദറിനോട് ആവശ്യപ്പെട്ടിരിക്കുന്നത്. 2016 മുതല്‍ 26 ശസ്ത്രക്രിയകളാണ് നടത്തിയത്. കഴിഞ്ഞ വര്‍ഷം മെയ് മുതലാണ് വീണ്ടും അസാധാരണ രീതിയില്‍ ശരീര വളര്‍ച്ചയുണ്ടായത്.
'ട്രീ മാന്‍ സിന്‍ഡ്രോം' എന്ന അപൂര്‍വ ജനിതകരോഗമാണ് ഈ ബംഗ്ലാദേശ് സ്വദേശിയുടെ ജീവിതം ദുരിതത്തിലാക്കിയത്.
റിക്ഷവലിക്കാരനായിരുന്ന ബജന്ദറിന് രോഗം പ്രത്യക്ഷപ്പെട്ടതിനു ശേഷം ജോലി ചെയ്യാന്‍ സാധിക്കാതായി. കഴിഞ്ഞ വര്‍ഷം ചികിത്സയ്ക്കിടെ വീണ്ടും വളര്‍ച്ച തുടങ്ങിയതോടെ ജീവനക്കാരെ അറിയിക്കാതെ ബജേന്ദര്‍ ആശുപത്രി വിട്ടു. രോഗം പിന്നെയും പ്രത്യക്ഷപ്പെട്ടു തുടങ്ങിയിട്ടുണ്ട്. ആശുപത്രിയില്‍നിന്ന് ഓടിപ്പോന്നത് തന്റെ തെറ്റാണ്. എന്നാല്‍ ഇത്തവണ ഡോക്ടര്‍മാര്‍ക്ക് തന്റെ രോഗം പൂര്‍ണമായി ഭേദമാക്കാന്‍ സാധിക്കുമെന്നാണ് പ്രതീക്ഷിക്കുന്നത് -ബജേന്ദര്‍ പറയുന്നു.