ന്യൂഡല്‍ഹി:അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനൊപ്പം ഇന്തിയിലെത്തുന്ന മെലാനിയ  ട്രംപ് ഡല്‍ഹി സര്‍ക്കാര്‍ സ്‌കൂള്‍ സന്ദര്‍ശിക്കും. സ്‌കൂളിലെ ഹാപ്പിനസ് ക്ലാസ് സന്ദര്‍ശിക്കാനാണ് മെലാനിയ ട്രംപ് എത്തുന്നത്.

മെലാനിയ ട്രംപിന്റെ സന്ദര്‍ശനത്തില്‍ ഡല്‍ഹി മുഖ്യമന്ത്രി അരവിന്ദ് കെജ്‌രിവാളും ഉപമുഖ്യമന്ത്രി മനീഷ് സിസോദിയയും പങ്കെടുക്കില്ല. നേരത്തെയുള്ള പദ്ധതി പ്രകാരം, കെജ്‌രിവാളും സിസോഡിയയുമായിരുന്നു മെലാനിയ ട്രംപിനെ സൗത്ത് ഡല്‍ഹി സര്‍ക്കാര്‍ സ്‌കൂളില്‍ സ്വീകരിക്കേണ്ടിയിരുന്നത്. പരിപാടിയില്‍ നിന്ന്‌
കേന്ദ്രസര്‍ക്കാര്‍ മനപൂര്‍വ്വം ഒഴിവാക്കിയതാണെന്നാണ് ആം ആദ്മി പാര്‍ട്ടി ആരോപിക്കുന്നത്.

ട്രംപിന്റെ ഇന്ത്യാ സന്ദര്‍ശനത്തിന്റെ രണ്ടാം ദിവസമായ ചൊവ്വാഴ്ചയാണ് മെലാനിയ ട്രംപ് പ്രത്യേക അതിഥിയായി സ്‌കൂള്‍ സന്ദര്‍ശിക്കുക. ഒരു മണിക്കൂര്‍ നീണ്ടുനില്‍ക്കുന്ന സന്ദര്‍ശനത്തില്‍ സ്‌കൂള്‍ വിദ്യാര്‍ഥികള്‍ക്കൊപ്പം അവര്‍ സമയം ചെലവഴിക്കും. വിദ്യാര്‍ഥികളുടെ ആശങ്കയും ഉല്‍കണ്ഠയും അകറ്റുന്നതിന് വേണ്ടി രണ്ടുവര്‍ഷം മുമ്പ് മനീഷ് സിസോദിയയാണ് 'ഹാപ്പിനെസ്സ് കരിക്കുലം' അവതരിപ്പിക്കുന്നത്.