സന: യു.എസിനെ ഞെട്ടിച്ച് വീണ്ടും ഹൂതികള്‍. യെമന്‍ തീരത്ത് യുഎസ് യുദ്ധക്കപ്പലുകള്‍ക്ക് നേരെ ഹൂതി ആക്രമണമുണ്ടായതായി റിപ്പോര്‍ട്ട്. വിമാനവാഹിനി കപ്പലായ എബ്രഹാം ലിങ്കണും മിസൈല്‍വേധ സംവിധാനമുള്ള രണ്ട് കപ്പലുകള്‍ക്കും നേരെയാണ് മിസൈല്‍, ഡ്രോണ്‍ ആക്രമണമുണ്ടായത്. ആക്രമണം പെന്റഗണ്‍ സ്ഥിരീകരിച്ചിട്ടുണ്ട്. 

ബാബുല്‍ മന്ദബ് കടലിടുക്കിലൂടെ സഞ്ചരിക്കുകയായിരുന്ന യു.എസ് കപ്പലുകള്‍ക്ക് നേരെ ആക്രമണമുണ്ടായെന്നാണ് സ്ഥിരീകരണം.  അതേ സമയം, യു.എസ് സൈന്യത്തിന്റെ സെന്‍ട്രല്‍ കമാന്‍ഡ് അത് ഫലപ്രദമായി പ്രതിരോധിച്ചെന്നും പെന്റഗണ്‍ വക്താവ് മേജര്‍ ജനറല്‍ പാട്രിക്ക് റൈഡര്‍ പറഞ്ഞു.

യു.എസ് മിസൈല്‍വേധ സംവിധാനത്തിന് നേരെയും ആക്രമണമുണ്ടായി. യ.ുഎസ്.എസ് സ്റ്റോക്ക്ഡേല്‍, യു.എസ്.എസ് സ്പ്രുന്‍സ് എന്നിവക്ക് നേരെയാണ് ആക്രമണമുണ്ടായത്. എട്ട് ഡ്രോണ്‍ ആക്രമണങ്ങളും അഞ്ച് ബാലിസ്റ്റിക് മിസൈല്‍ ആക്രമണവും മൂന്ന് ക്രൂയിസ് മിസൈല്‍ ആക്രമണവുമാണ് ഉണ്ടായതെന്ന് റൈഡര്‍ പറഞ്ഞു. എല്ലാ ആക്രമണങ്ങളും ഫലപ്രദമായി പ്രതിരോധിച്ചെന്നും ഏതെങ്കിലും തരത്തിലുള്ള നാശനഷ്ടമോ ആളപായമോ ഉണ്ടായിട്ടില്ലെന്നും റൈഡര്‍ വ്യക്തമാക്കി.