കല്‍പ്പറ്റ: ദിവസങ്ങളായി പ്രദേശത്ത് ഭീതി പരത്തിയ പുലിയെ വനം വകുപ്പ് പിടികൂടിയിട്ടും ആശങ്ക ഒഴിയാതെ ഗൂഡലായികുന്ന്.
കഴിഞ്ഞ ദിവസം രാത്രിയില്‍ ഗൂഡലായിക്കുന്ന് എസ്.സി ഹോസ്റ്റല്‍ കെട്ടിടത്തിന് സമീപത്തായി നാട്ടുകാര്‍ രണ്ട് പുലിക്കുഞ്ഞുങ്ങളേയും ഒരു പുലിയേയും കണ്ടതോടെയാണ് പ്രദേശം വീണ്ടും ഭീതിയിലായത്. ഗൂഡലായികുന്ന് ബാവയുടെ വീട്ട് മുറ്റത്ത് പുലികള്‍ നില്‍ക്കുന്നത് നാട്ടുകാര്‍ കണ്ടിരുന്നു. പുലിയുടെ കാല്‍ അടയാളങ്ങളും കാഷ്ടവും നാട്ടുകാര്‍ തെളിവായി വനപാലകരെ കാണിച്ചു. കഴിഞ്ഞ വെള്ളിയാഴ്ച്ച ഇവിടെ നിന്നും കൂട് വച്ച് ഒരു പുലിയെ പിടികൂടിയിരുന്നു. തുടര്‍ന്ന് പുലി ഭീതി വിട്ടൊഴിഞ്ഞെന്ന ആശ്വാസത്തില്‍ കഴിയുമ്പോഴാണ് വീണ്ടും പുലി ഇറങ്ങിയത്. നേരത്തെ വനം വകുപ്പ് അധികൃതര്‍ പുലിയെ പിടികൂടി നാട്ടുകാരെ കാണിച്ചെങ്കിലും പിടിയിലായ പുലിയല്ല പ്രദേശത്ത് ഭീതി പരത്തുന്നതെന്ന് നാട്ടുകാര്‍ പറഞ്ഞിരുന്നു. പുലിയെ പിടികൂടി നാട്ടുകാരുടെ ജീവനും സ്വത്തിനും സംരക്ഷണം നല്‍കണമെന്ന ആവശ്യവും ശക്തമായിരിക്കുകയാണ്.