അന്വേഷണ ചുമതല എ.ടി.എസിന്

കൊല്ലം: കുളത്തൂപ്പുഴയിലെ വനമേഖലയില്‍ 14 വെടിയുണ്ടകള്‍ ഉപേക്ഷിക്കപ്പെട്ട നിലയില്‍ കണ്ടെത്തിയ സംഭവത്തില്‍ അന്വേഷണം മറ്റു സംസ്ഥാനങ്ങളിലേക്കും വ്യാപിപ്പിക്കുന്നു. മേജര്‍ മുകേഷിന്റെ നേതൃത്വത്തിലുള്ള മിലിട്ടറി ഇന്റലിജന്‍സിനൊപ്പം അന്വേഷണത്തിന് എന്‍.ഐ.എയും എത്തിയിരുന്നു.

സംസ്ഥാന ആന്റി ടെററിസ്റ്റ് സ്‌ക്വാഡിനാ(എ.ടി.എസ്)ണ് അന്വേഷണ ചുമതല. എ.ടി.എസ് ഡി.ഐ.ജി അനില്‍ ജോണ്‍ കുരുവിള നേതൃത്വം നല്‍കുന്ന ടീമില്‍ ലോക്കല്‍ പൊലിസിനെ കൂടാതെ ക്രൈംബ്രാഞ്ചിനെയും ഉള്‍പ്പെടുത്തിയിട്ടുണ്ട്. 

സംസ്ഥാന എ.ടി.എസ് തലവന്‍ എ.ഡി.ജി.പി ടോമിന്‍ തച്ചങ്കരിയുടെ നേതൃത്വത്തില്‍ ഇന്നലെ സ്ഥലം പരിശോധിരുന്നു. എ.ടി.എസും മിലിട്ടറി ഇന്റലിജന്റ്‌സും എന്‍.ഐ.എയും വെടിയുണ്ട കണ്ടെത്തിയവരില്‍ നിന്നും മൊഴിയെടുത്തു. 

വെടിയുണ്ട പാകിസ്താന്‍ നിര്‍മിതമെന്നു സംശയമുള്ളതിനാല്‍ കേന്ദ്ര ഏജന്‍സികളും പരിശോധനയ്ക്ക് എത്തുമെന്ന് സൂചയുണ്ടായിരുന്നു. പി.ഒ.എഫ് എന്ന് വെടിയുണ്ടകളില്‍ രേഖപ്പെടുത്തിയിട്ടുണ്ടെന്നു കണ്ടെത്തിയതോടെയാണ് അന്വേഷണം പാകിസ്താനെക്കുറിച്ചും നീണ്ടത്. 

പാകിസ്താന്‍ ഓര്‍ഡിനന്‍സ് ഫാക്ടറിയുടെ ചുരുക്കപ്പേരാണ് പി.ഒ.എഫ് എന്നാണ് നിഗമനം. അതേസമയം, പ്രാഥമിക അന്വേഷണത്തില്‍ ചില സൂചന ലഭിച്ചതായാണ് വിവരം. ഇതിനെത്തുടര്‍ന്ന് അന്വേഷണസംഘം മറ്റു സംസ്ഥാനങ്ങളിലെ ഡി.ജി.പിമാരുമായി ബന്ധപ്പെട്ടു തുടങ്ങി. 

പാക് സാന്നിധ്യം സംശയിക്കുന്ന സാഹചര്യത്തിലാണ് എന്‍.ഐ.എ സംഘം അന്വേഷണത്തിന് എത്തിയത്.