അന്‍സാര്‍ തുരുത്ത്

കഴക്കൂട്ടം: പാര്‍വതീ പുത്തനാറിന് തീരത്തെ പുറംമ്പോക്ക് ഭൂമി കൈയേറി അനധികൃത കെട്ടിട നിര്‍മാണ പ്രവര്‍ത്തനങ്ങള്‍ വ്യാപകമാകുന്നു. പുത്തനാര്‍ നവീകരിച്ച് ദേശീയ ജലപാത നടപ്പിലാക്കാനുള്ള പ്രവര്‍ത്തനങ്ങള്‍ ഒരറ്റത്ത് നടക്കുമ്പോഴാണ് കഠിനംകുളം ഗ്രാമപഞ്ചായത്ത് പരിധിയിലെ സെന്റാഡ്രൂസിന് സമീപത്തെ പുത്തനാറിന്റെ തീരങ്ങളില്‍ നിര്‍മാണ പ്രവര്‍ത്തനങ്ങള്‍ പൊടിപൊടിക്കുന്നത്. ഇതിനൊപ്പം തന്നെ ആറിന് സമീപത്ത് ഫോറസ്റ്റ് വിഭാഗം വച്ച് പിടിപ്പിച്ച കൂറ്റന്‍ മരങ്ങളും വെട്ടിമുറിച്ച് കടത്തുന്നുണ്ട്.
കഠിനംകുളം പഞ്ചായത്ത് ഓഫിസിന് സമീപത്ത് നടക്കുന്ന ഈ മോഷണം അധികൃതരും ജനപ്രതിനിധികളും കണ്ടിട്ടും കാണാത്ത അവസ്ഥയാണ്. കോവളത്ത് നിന്ന് ആരംഭിച്ച് കാസര്‍കോട് അവസാനിക്കുന്ന ദേശീയ ജലപാതക്ക് വേണ്ടിയുള്ള ഒരുക്കങ്ങളും പ്രവൃത്തികളും നടക്കുന്നതിനിടെയാണ് തീരങ്ങള്‍ കൈയേറി നിര്‍മാണം നടത്തുന്നത്.
കോവളത്ത് നിന്നും ആരംഭിച്ച് ചാന്നാങ്കരയില്‍ കഠിനംകുളം കായലില്‍ സംഘമിക്കുന്ന പുത്തനാറിന് ഇരുകരകളിലും നിലവില്‍ നൂറ് കണക്കിന് കുടുംബങ്ങളാണ് താമസിക്കുന്നത്. ഇതില്‍ ഏറ്റവും കൂടുതല്‍ കുടുംബങ്ങള്‍ താമസിക്കുന്നിടം പള്ളിത്തുറ മുതല്‍ ചാന്നാങ്കര വരെയുള്ള തീരങ്ങളിലാണ്. ദേശീയ ജലപാതയുടെ നിര്‍മാണ പ്രവര്‍ത്തനങ്ങളുടെ ഭാഗമായി ഈ കുടുംബങ്ങളെ കുടിയൊഴിപ്പിക്കാനുള്ള നടപടികള്‍ പുരോഗമിക്കവേയാണ് ഭൂമി കൈയ്യേറി ഇപ്പോഴും നിര്‍മാണ പ്രവര്‍ത്തനങ്ങള്‍ നടക്കുന്നത്.
ബന്ധപ്പെട്ട വിഭാഗങ്ങളെ വിവരം ധരിപ്പിച്ചിട്ടും ആരും തിരിഞ് നോക്കാത്ത അവസ്ഥയാണ്. ജലപാത വികസനവുമായി ബന്ധപ്പെട്ട് കുടിയൊഴിപ്പിക്കുന്നവര്‍ക്ക് സര്‍ക്കാര്‍ നല്‍കുന്ന നഷ്ട പരിഹാരം ഇപ്പോള്‍ നിര്‍മാണം നടത്തുന്നവര്‍ക്കും ലഭിക്കുന്നതിനാണ് ഇപ്പോഴുള്ള നിര്‍മാണമെന്നാണ് അറിയുന്നത്. ഇവര്‍ക്ക് വേണ്ട സംരക്ഷണം നല്‍കി വരുന്നത് പ്രദേശത്തെ രാഷ്ട്രീയ പ്രവര്‍ത്തകരെന്ന ആക്ഷേപവും വ്യാപകമാണ്. ജലപാതയുടെ ഭാഗമായി വര്‍ഷങ്ങള്‍ക്ക് മുന്‍പ് പാര്‍വതീ പുത്തനാറിന്റെ അതിര്‍ത്തി അളന്ന് ബന്ധപ്പെട്ടവര്‍ സ്ഥലത്ത് രേഖപെടുത്തിയിട്ടുണ്ടെങ്കിലും ഇതൊന്നും കാര്യമാക്കാതെയാണ് നിര്‍മാണങ്ങള്‍ പുരോഗമിക്കുന്നത്.
ദേശീയ ജലപാത അതിന്റെ പൂര്‍ണതയിലെത്തിക്കാന്‍ സര്‍ക്കാര്‍ കണക്കാക്കുന്നത് 3,500 കോടിയാണ്. ഇതിന്റെ ആദ്യഗഡുവായി 2017-18 കേരള ബജറ്റില്‍ 50 കോടി രൂപ വകവരുത്തിയിട്ടുണ്ട്. 2020 അവസാനത്തോടെ ദേശീയ ജലഗതാഗതം പൂര്‍ണതയിലെത്തിക്കുമെന്നാണ് സര്‍ക്കാര്‍ പ്രഖ്യാപനം. എന്നാല്‍ ഇപ്പോഴും പുത്തനാര്‍ തീരത്തെ കര കൈയേറിയുള്ള നിര്‍മാണ പ്രവര്‍ത്തനങ്ങളാണ് നടക്കുന്നത്.
രാത്രിയിലെ മരം മോഷണത്തിന് തടസമൊന്നുമില്ലാതായോടെ ഇപ്പോള്‍ പകല്‍ സമയങ്ങളിലും ഇത് വ്യാപകമാണ്. പ്രാദേശിക രാഷ്ട്രീയ നേതാക്കളുടെ ഒത്താശയോടെ പ്രദേശത്തെ സാമൂഹിക വിരുദ്ധരും ക്രിമിനലുകളുമാണ് ഇതിന് പിന്നിലുള്ളതെന്നാണ് പറയുന്നത്.