ആലപ്പുഴ: കയര്‍ മേഖലയിലെ പ്രശ്‌നങ്ങള്‍ പരിഹരിക്കാന്‍ വകുപ്പ് മന്ത്രിയായ തോമസ് ഐസക്ക് ഒന്നും ചെയ്യുന്നില്ലെന്ന് സി.പി.ഐ ജില്ലാ സെക്രട്ടറി ടി.ജെ ആഞ്ചലോസ്. കേരളാ സ്റ്റേറ്റ് കയര്‍ തൊഴിലാളി ഫെഡറേഷന്‍ എ.ഐ.ടി.യു.സി സംഘടിപ്പിച്ച 'രോഷാഗ്നി' പരിപാടി ആലപ്പുഴയില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ചര്‍ച്ചയ്ക്കുപോലും മന്ത്രി തയാറാകാത്ത സ്ഥിതിയാണ്. നാലുവര്‍ഷം കൊണ്ട് നടപ്പിലാക്കാത്ത കയര്‍ കമ്പനി അഞ്ചാം വര്‍ഷം നടപ്പിലാക്കുമെന്നാണ് ഐസക്ക് ഇപ്പോള്‍ പറയുന്നത്. പ്രകടനപത്രികയില്‍ പറഞ്ഞ കാര്യമാണ് കയര്‍ കമ്പനി. കയര്‍മേള നടത്തി ഓര്‍ഡറുകള്‍ ലഭിച്ചുവെന്നു പറയുന്നതിലൊന്നും ഒരടിസ്ഥാനവുമില്ല. സര്‍വ കയര്‍ഫാക്ടറികളും പൂട്ടിക്കിടക്കുകയാണ്. ചെറുകിട കയര്‍ ഫാക്ടറികള്‍ എങ്ങും ചലിക്കുന്നില്ല. വിലയുമില്ല, വേലയുമില്ല. കൂലിയും പെന്‍ഷനുമില്ലാതെ പരമ്പരാഗത കയര്‍ ഫാക്ടറി തൊഴിലാളികള്‍ വലയുകയാണെന്നും ആഞ്ചലോസ് പറഞ്ഞു. കയര്‍ തൊഴിലാളികള്‍ നേരിടുന്ന പതിനെട്ടോളം അടിയന്തിരാവശ്യങ്ങള്‍ ഉന്നയിച്ചുകൊണ്ടാണ് ഫെഡറേഷന്‍ പ്രതിഷേധം സംഘടിപ്പിച്ചത്. തുടര്‍ന്ന് കയര്‍ ഉല്‍പന്നങ്ങള്‍ പ്രതീകാത്മകമായി കത്തിച്ചു.