സ്വന്തം ലേഖകന്‍
തിരുവനന്തപുരം: ലൈഫ് പദ്ധതി പ്രകാരം സംസ്ഥാനത്ത് രണ്ടു ലക്ഷം വീടുകള്‍ പൂര്‍ത്തീകരിച്ചു. പദ്ധതിയുടെ മൂന്നാംഘട്ടത്തില്‍ 1,6095 കുടുംബങ്ങള്‍ക്ക് വീടുകള്‍ നിര്‍മിച്ചുനല്‍കാനാണ് ലക്ഷ്യംവയ്ക്കുന്നത്. രണ്ട് ലക്ഷം വീടുകളുടെ പൂര്‍ത്തീകരണത്തിന്റെ പ്രഖ്യാപനം 29 ന് തിരുവനന്തപുരം പുത്തരിക്കണ്ടം മൈതാനത്ത് മുഖ്യമന്ത്രി പിണറായി വിജയന്‍ നിര്‍വഹിക്കും.
മൂന്നാംഘട്ടത്തില്‍ ഭൂരഹിത ഭവനരഹിതരുടെ പുനരധിവാസമാണ് ലക്ഷ്യംവയ്ക്കുന്നതെന്നു തദ്ദേശസ്വയംഭരണ വകുപ്പ് മന്ത്രി എ.സി മൊയ്തീനും ടൂറിസം -സഹകരണ മന്ത്രി കടകംപള്ളി സുരേന്ദ്രനും വാര്‍ത്താസമ്മേളനത്തില്‍ പറഞ്ഞു.
2017 ല്‍ തുടക്കം കുറിച്ച ലൈഫ് പദ്ധതി മൂന്ന് ഘട്ടങ്ങളിലായാണ് വിഭാവനം ചെയ്തിരിക്കുന്നത്. ഒന്നാംഘട്ടത്തില്‍ പൂര്‍ത്തീകരിക്കേണ്ടിയിരുന്ന 54,173 വീടുകളില്‍ 52,050 വീടുകളാണ് പൂര്‍ത്തിയാക്കിയത്. രണ്ടാം ഘട്ടത്തില്‍ ഭൂമിയുള്ള ഭവനരഹിതരുടെ ഭവനനിര്‍മാണമായിരുന്നു. ഇവരില്‍ 74674 വീടുകളുടെ ഭവനനിര്‍മാണം പൂര്‍ത്തിയാക്കി. ലൈഫ്- പി.എം.എ.വൈ പദ്ധതിപ്രകാരം 79520 വീടുകള്‍ക്ക് പണി ആരംഭിക്കുകയും 47144 വീടുകള്‍ പൂര്‍ത്തീകരിക്കുകയും ചെയ്തു. രണ്ടു ലക്ഷം വീട് പൂര്‍ത്തീകരിച്ചുകൊണ്ടുള്ള ഗൃഹപ്രവേശനം 29 ന് രാവിലെ എട്ടരയ്ക്ക് കരംകുളത്ത് ഏണിക്കരയില്‍ മുഖ്യമന്ത്രിയുടെ സാന്നിധ്യത്തില്‍ നടക്കും.
വൈകിട്ട് മൂന്നിനു നടക്കുന്ന ഗുണഭോക്താക്കളുടെ കുടുംബസംഗമത്തില്‍ മുഖ്യമന്ത്രി പൂര്‍ത്തീകരണപ്രഖ്യാപനം നടത്തും. ലൈഫ് പദ്ധതിയുടെ മൂന്നാംഘട്ടത്തിന്റെ ഭാഗമായി അടിമാലിയില്‍ 217 കുടുംബങ്ങള്‍ക്ക് താമസിക്കാന്‍ കഴിയുന്ന ഭവനസമുച്ചയം പൂര്‍ത്തീകരിച്ച് അടിമാലി ഗ്രാമപഞ്ചായത്തിലെ അര്‍ഹരമായ മുഴുവന്‍ പേര്‍ക്കും കൈമാറി. അങ്കമാലിയില്‍ 12 കുടുംബങ്ങള്‍ക്കായുള്ള ഭവനസമുച്ചയം പൂര്‍ത്തീകരിച്ചു. മൂന്നാംഘട്ടത്തില്‍ 100 ഭവനസമുച്ചയങ്ങളാണ് പൂര്‍ത്തീകരിക്കുകരിക്കുകയെന്നും മൂന്നാം ഘട്ടത്തിനായി 31 കോടി രൂപ ഇതുവരെ ചെലവഴിച്ചെന്നും മന്ത്രിമാര്‍ പറഞ്ഞു.