ദുബൈ: സുരക്ഷാ കാരണങ്ങളാൽ താത്കാലികമായി നിർത്തിവെച്ചിരുന്ന ദുബൈ വിമാനത്താവളത്തിന്റെ പ്രവർത്തനം ഭാഗികമായി പുനരാരംഭിച്ചു. ദുബൈ അന്താരാഷ്ട്ര വിമാനത്താവളം (DXB), അൽ മക്തൂം വിമാനത്താവളം (DWC) എന്നിവിടങ്ങളിൽ നിന്ന് വിമാനങ്ങൾ സർവീസ് തുടങ്ങി. ഇന്ന് ഉച്ചയോടെ എമിറേറ്റ്‌സ് എയർലൈൻ തങ്ങളുടെ സർവീസുകൾ പൂർണ്ണമായി പുനരാരംഭിച്ചതായി അറിയിച്ചു.

വിമാനങ്ങളുടെ സമയക്രമത്തിൽ മാറ്റം വരാൻ സാധ്യതയുള്ളതിനാൽ, വിമാനക്കമ്പനികളിൽ നിന്ന് നേരിട്ട് സ്ഥിരീകരണം ലഭിച്ച യാത്രക്കാർ മാത്രം എയർപോർട്ടിലേക്ക് എത്തിയാൽ മതിയെന്ന് അധികൃതർ നിർദ്ദേശിച്ചു. വിമാനത്താവളത്തിലെ അനാവശ്യ തിരക്ക് ഒഴിവാക്കാനാണ് ഈ കർശന നിർദ്ദേശം. ദുബൈയിൽ നിന്ന് പുറപ്പെടുന്നവർക്കും ട്രാൻസിറ്റ് യാത്രക്കാർക്കും നിലവിൽ തടസ്സങ്ങളില്ലാതെ യാത്ര തുടരാനാകും. എങ്കിലും യാത്രയ്ക്ക് മുൻപായി വിമാനങ്ങളുടെ ഏറ്റവും പുതിയ സമയവിവരങ്ങൾ ഓൺലൈനായി പരിശോധിക്കണമെന്ന് എമിറേറ്റ്‌സ് അഭ്യർത്ഥിച്ചു.

ALSO READ: ദുബൈ അന്താരാഷ്ട്ര വിമാനത്താവളം താല്‍ക്കാലികമായി അടച്ചു; സിറ്റി ചെക്ക്ഇന്‍ കൗണ്ടറുകളും പൂട്ടി; നിരവധി സര്‍വിസുകളെ ബാധിക്കുന്നു

ഇന്ന് രാവിലെ ദുബൈയ്ക്ക് നേരെ വീണ്ടും ആക്രമണം ഉണ്ടായതായി ദുബൈ മീഡിയ ഓഫീസ് സ്ഥിരീകരിച്ചിരുന്നു. ആക്രമണത്തിൽ ആർക്കും പരുക്കേറ്റിട്ടില്ലെങ്കിലും, യാത്രക്കാരുടെയും ജീവനക്കാരുടെയും സുരക്ഷ കണക്കിലെടുത്താണ് രാവിലെ വിമാനത്താവളത്തിന്റെ പ്രവർത്തനം അടിയന്തരമായി നിർത്തിവെച്ചത്. നിലവിൽ സ്ഥിതിഗതികൾ നിയന്ത്രണവിധേയമാണെന്നും സുരക്ഷയ്ക്കാണ് തങ്ങൾ മുൻഗണന നൽകുന്നതെന്നും അധികൃതർ വ്യക്തമാക്കി.

യാത്രക്കാർക്കുണ്ടായ ബുദ്ധിമുട്ടിൽ ഖേദം പ്രകടിപ്പിച്ച അധികൃതർ, സഹകരണത്തിന് നന്ദി അറിയിക്കുകയും ചെയ്തു. അസാധാരണ സാഹചര്യങ്ങൾ കണക്കിലെടുത്ത് വിമാനത്താവളത്തിൽ കനത്ത സുരക്ഷാ നിരീക്ഷണമാണ് ഏർപ്പെടുത്തിയിരിക്കുന്നത്.

dubai international airport has partially reopened after disruptions, with emirates gradually resuming flight operations. authorities said services are being restored in phases while prioritizing passenger safety and clearing the backlog caused by recent regional tensions.