പെരുമ്പാവൂര്‍: അരുവപ്പാറ സുനില്‍ വധകേസില്‍ ഒരാളെ കൂടി കുറുപ്പംപടി പൊലീസ് പിടികൂടി. കേസിലെ രണ്ടാം പ്രതി കൊല്ലപ്പെട്ട സുനിയുടെ അയല്‍വാസിയായ അരുവാപ്പാറ ചെറങ്ങര വീട്ടില്‍ സനു ചന്ദ്രന്‍(22) ആണ് അറസ്റ്റിലായത്.
സംഭവത്തിന് ശേഷം ഒളിവില്‍ പോയ പ്രതി മൂന്നാര്‍, കോതമംഗലം, അടിമാലി എന്നിവിടങ്ങളില്‍ ഒളിവിലായിരുന്നു. കേസിലെ നാല് പ്രതികളും ഒരുമിച്ചായിരുന്നു ഒളിവില്‍ കഴിഞ്ഞിരുന്നത്. എന്നാല്‍ ഇടയ്ക്ക് വച്ച് പ്രതി ഒറ്റക്ക് മുങ്ങി നടക്കുകയായിരുന്നു. തുടര്‍ന്ന് പൊലിസ് പ്രതിയുടെ ബന്ധുക്കളുടെ വിവരങ്ങള്‍ ശേഖരിച്ച് നടത്തിയ അന്വേഷണത്തില്‍ കിഴക്കമ്പലം താമരച്ചാലുള്ള പ്രതിയുടെ അകന്ന ബന്ധുവിന്റെ വീട്ടില്‍ നിന്നും കസ്റ്റഡിലെടുക്കുകയായിരുന്നു.
പ്രതിയെ പിടികൂടിയ സംഘത്തില്‍ എസ്.ഐ യാക്കോബ്, എ.എസ്.ഐ സെയ്ത്, എസ്.സി.പി.ഒമാരായ ബിജു, സിറാജ് എന്നിവരുണ്ടായിരുന്നു. വീടിനടുത്ത് പരസ്യമായി മദ്യപാനം ചോദ്യം ചെയ്തതിനെ തുടര്‍ന്ന് പ്രതികളായ നാല് പേരും ചേര്‍ന്ന് വേങ്ങൂര്‍ മുനിപ്പാറ കൊമ്പനാട് കളത്തിപ്പടി വീട്ടില്‍ കുറുമ്പന്‍ മകന്‍ സുനില്‍ (40)നെ മര്‍ദ്ദിച്ച് കൊന്നതാണ് കേസിനാസ്പദമായ സംഭവം. കഴിഞ്ഞ 21നാണ് സംഭവം നടന്നത്. പിടിയിലായ സനു വധശ്രമം ഉള്‍പ്പെടെ നിരവധി കേസുകളില്‍ പ്രതിയാണ്. നേരത്തെ കേസിലെ ഒന്നാം പ്രതി അരുവപ്പാറ മാലിക്കുടി വീട്ടില്‍ ബേസില്‍ (23), മൂന്നാം പ്രതി നെടുങ്ങപ്ര കൊച്ചങ്ങാടി കല്ലിടുമ്പില്‍ വീട്ടില്‍ അമല്‍ (24) എന്നിവരെ പൊലിസ് അറസ്റ്റ് ചെയ്തിരുന്നു. കേസില്‍ നാലാം പ്രതി എളമ്പിള്ളി വീട്ടില്‍ റോബിന്‍ വര്‍ഗീസ് (23)നെ കൂടി പിടികൂടാനുണ്ട്.
കൊല്ലപ്പെട്ട സുനില്‍ പട്ടികജാതി വിഭാഗത്തിലുള്ള ആളായതിനാല്‍ മുവാറ്റുപുഴ ഡി.വൈ.എസ്.പിക്കാണ് അന്വേഷണ ചുമതല. പ്രതിയെ കോടതിയില്‍ ഹാജരാക്കി റിമാന്റ് ചെയ്തു.