മണ്ണഞ്ചേരി (ആലപ്പുഴ): കേരളത്തെ അടുത്ത ഒരു വര്‍ഷത്തിനുള്ളില്‍ പട്ടിണി രഹിത സംസ്ഥാനമാക്കുമെന്ന് ധനമന്ത്രി ടി.എം.തോമസ് ഐസക് പറഞ്ഞു.

സംസ്ഥാന ബജറ്റില്‍ പ്രഖ്യാപിച്ച കുടുംബശ്രീയുടെ ജനകീയ ഹോട്ടലുകളുടെ സംസ്ഥാനതല ഉദ്ഘാടനം  ആലപ്പുഴ മണ്ണഞ്ചേരിയില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.

ലോകത്തിലെ പട്ടിണിക്കാരുടെ പട്ടികയില്‍ ഇന്ത്യയുടെ സ്ഥാനം 113 ആണ്. അങ്ങനെയുള്ള ഒരു രാജ്യത്തിലെ കൊച്ചു സംസ്ഥാനമായ കേരളത്തില്‍ പട്ടിണിയില്ലാതാക്കാനുള്ള പരിശ്രമം പരിപൂര്‍ണ വിജയം വരിക്കുമെന്നും ധനമന്ത്രി പറഞ്ഞു.

കഴിഞ്ഞ ബജറ്റില്‍ 1000 ഭക്ഷണശാലകളാണ് നടപ്പിലാക്കുമെന്ന് പ്രഖ്യാപിച്ചിരുന്നതെങ്കില്‍ ഒരു വര്‍ഷത്തിനുള്ളില്‍ തന്നെ 5000 ജനകീയ ഭക്ഷണശാലകള്‍ പ്രവര്‍ത്തിപ്പിക്കാന്‍ സര്‍ക്കാര്‍ ശ്രമിക്കുമെന്നും തോമസ് ഐസക് പറഞ്ഞു.

25 രൂപയ്ക്കാണ് ഊണിന്റെ വിതരണമെങ്കിലും പണം കൈയില്‍ ഇല്ലാത്തവര്‍ക്കായി ഷെയര്‍ മീല്‍സ്‌കൂപ്പണ്‍ സ്‌പോണ്‍സര്‍മാരിലൂടെ ഇവിടെ ലഭ്യമാക്കും. ഹോട്ടല്‍ മുറിവാടക, വൈദ്യുതി ചാര്‍ജ്ജ്, വെള്ളം എന്നിവ പഞ്ചായത്തുകള്‍ നല്‍കുമെന്നും മന്ത്രി അറിയിച്ചു. ഹോട്ടലിന്റെ പ്രവര്‍ത്തനങ്ങള്‍ക്കായുള്ള ധാന്യങ്ങള്‍ മാവേലി സ്‌റ്റോറുകളില്‍നിന്നു സബ്‌സിഡിയിനത്തില്‍ നല്‍കാനുള്ള സംവിധാനവും ഒരുക്കുമെന്ന് ധനമന്ത്രി അറിയിച്ചു. 

അതേസമയം ജനകീയ ഹോട്ടല്‍ ഉദ്ഘാടകനായി തീരുമാനിച്ചിരുന്ന ഭക്ഷ്യ സിവില്‍ സപ്ലൈയ്‌സ് വകുപ്പു മന്ത്രി പി. തിലോത്തമന്‍ പരിപാടിയില്‍ പങ്കെടുത്തില്ല. 

കയര്‍ മേഖലയിലെ പ്രശ്‌നങ്ങളുമായി ബന്ധപ്പെട്ട കഴിഞ്ഞ ദിവസങ്ങളില്‍ സി.പി.ഐ ജില്ലാ നേതൃത്വവും കയര്‍ വകുപ്പിന്റെ ചുമതലക്കാരനായ മന്ത്രി ടി.എം. തോമസ് ഐസക്കുമായി പരസ്യമായി കൊമ്പു കോര്‍ത്തിരുന്നു.