അഞ്ചല്‍: തളച്ചിരുന്ന ആനയുടെ സമീപമെത്തിയ യുവാവിന് ആനയുടെ ആക്രമണത്തില്‍ പരുക്ക്. പനയഞ്ചേരി വയലിറക്കത്ത് വീട്ടില്‍ സുരേഷ് ബാബുവിനാ(40)ണ് പരുക്കേറ്റത്. പനയഞ്ചേരി ധര്‍മശാസ്താ ക്ഷേത്രത്തില്‍ ഉത്സവ എഴുന്നള്ളിപ്പിനായി എത്തിയ ദേവസ്വം ബോര്‍ഡ് വക ആനയെ എഴുന്നള്ളിപ്പിന് ശേഷം സുരേഷ് ബാബുവിന്റെ വീട്ടുവളപ്പില്‍ തളച്ചിരുന്നു.
വര്‍ഷങ്ങളായി എഴുന്നള്ളത്തിന് എത്താറുള്ള ആനയെ ഉത്സവത്തിന് ശേഷം ഇവിടെയാണ് തളയ്ക്കാറുള്ളത്.
ഇത് മൂലം ആനയുമായി ഇണക്കവുമുണ്ടായിരുന്നു. എന്നാല്‍ ആനയുടെ പിന്നിലൂടെ എത്തിയ ഇയാളെ ആന തുമ്പിക്കെ കൊണ്ട് പിടിക്കുകയായിരുന്നു.
ഇതുകണ്ട ഇയാളുടെ ഭാര്യ ബഹളംവച്ചതോടെ ആന ഇയാളെ വലിച്ചെറിഞ്ഞു. ഗുരുതരമായി പരുക്കേറ്റ സുരേഷ് ബാബുവിനെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.