കോഴിക്കോട്: സംസ്ഥാനത്തെ ആദ്യത്തെ ജൈവവൈവിധ്യ ബ്ലോക്ക് പഞ്ചായത്തായി തെരഞ്ഞെടുക്കപ്പെട്ട കോഴിക്കോട് ബ്ലോക്ക് പഞ്ചായത്തിന്റെ ആഭിമുഖ്യത്തില്‍ ജൈവവൈവിധ്യ നയപ്രഖ്യാപന പാര്‍ലിമെന്റ് സംഘടിപ്പിച്ചു. ജൈവവൈവിധ്യ പാര്‍ക്കുകള്‍, നാട്ടുവഴികളില്‍ നാട്ടുപൂക്കള്‍, കണ്ടല്‍ കാടുകള്‍, പച്ചത്തുരുത്ത് തുടങ്ങി വിവിധങ്ങളായ പ്രവര്‍ത്തനങ്ങളിലൂടെ ജൈവവൈവിധ്യത്തെ സംരക്ഷിക്കാനും കാലാവസ്ഥാ വ്യതിയാനം, ആഗോള താപനം എന്നിവയുടെ ഭാരം കുറയ്ക്കാനുമുള്ള മറ്റു പ്രവര്‍ത്തനങ്ങളും ഒളവണ്ണ കടലുണ്ടി ഗ്രാമപഞ്ചായത്തുകളുമായി ചേര്‍ന്ന് ഒരു ജൈവവൈവിധ്യ ശൃംഖല രൂപീകരിക്കാനും അതു പ്രയോഗത്തില്‍ വരുത്താനും ഉദ്ദേശിച്ചുകൊണ്ടാണ് ജൈവ വൈവിധ്യ നയപ്രഖ്യാപന പാര്‍ലിമെന്റ് സംഘടിപ്പിച്ചത്.
കോഴിക്കോട് ബ്ലോക്ക് പഞ്ചായത്ത് ഹാളില്‍ നടന്ന ചടങ്ങില്‍ ഹരിതകേരള മിഷന്‍ ഉപാധ്യക്ഷ ഡോ. ടി.എന്‍ സീമ ഉദ്ഘാടനം ചെയ്തു. കോഴിക്കോട് ബ്ലോക്ക് പഞ്ചായത്ത് പ്രസിഡന്റ് എന്‍. മനോജ് കുമാര്‍ നയപ്രഖ്യാപനം നടത്തി. ഇതിന്റെ ഭാഗമായി ആരംഭിച്ച നാട്ടുവഴികളില്‍ നാട്ടുപൂക്കള്‍ പദ്ധതിയുടെ ഉദ്ഘാടനവും ഡോ. ടി.എന്‍ സീമ നിര്‍വ്വഹിച്ചു.
കടലുണ്ടി ഗ്രാമപഞ്ചായത്ത് പ്രസിഡന്റ് സി.കെ അജയകുമാര്‍, ഒളവണ്ണ ഗ്രാമപഞ്ചായത്ത് പ്രസിഡന്റ് കെ. തങ്കമണി, കോഴിക്കോട് ബ്ലോക്ക് പഞ്ചായത്ത് വൈസ് പ്രസിഡന്റ് എ.പി ഹസീന, വികസനകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ പി.ജി വിനീഷ്, ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ ദിനേശ് ബാബു അത്തോളി, പി. റംല, ഡോ. റീന, കെ. കൃഷ്ണകുമാരി, സി. ഉഷ സംസാരിച്ചു.