തളിപ്പറമ്പ്: ദേശീയപാതയില്‍ പരിയാരം പഞ്ചായത്ത് ബസ് സ്റ്റോപ്പിന് സമീപം വാഹനാപകടം. ലോറിയും ഓമ്‌നി വാനും കൂട്ടിയിടിച്ച് ഒരാള്‍ക്ക് പരുക്കേറ്റു. കാവുമ്പായി കൂട്ടുമുഖം സ്വദേശി നിധിന്‍ നാരായണ(29) നാണ് പരുക്കേറ്റത്. ഇന്നലെ വൈകിട്ട് അഞ്ചു മണിയോടെയായിരുന്നു സംഭവം. ചെറുവത്തൂരില്‍നിന്ന് തലശ്ശേരിയിലേക്ക് പോവുകയായിരുന്ന മത്സ്യലോറിയും എതിരെ വരികയായിരുന്ന ഓമ്‌നി വാനും തമ്മില്‍ കൂട്ടിയിടിക്കുകയായിരുന്നു.
ഇടിയുടെ ആഘാതത്തില്‍ നിയന്ത്രണംവിട്ട ലോറി മറിഞ്ഞു. അപകടത്തില്‍ ഓമ്‌നി വാന്‍ പൂര്‍ണമായും തകര്‍ന്നു. ലോറിയിലുണ്ടായിരുന്ന എട്ട് ടണ്ണോളം മത്സ്യം നശിച്ചു.
അപകടത്തില്‍ പരുക്കേറ്റ ഓമ്‌നി ഡ്രൈവര്‍ നിധിന്‍ നാരായണനെ ആദ്യം പരിയാരം മെഡിക്കല്‍ കോളജിലും പിന്നീട് മംഗളൂരുവിലെ ആശുപത്രിയിലും പ്രവേശിപ്പിച്ചു. അപകടത്തെ തുടര്‍ന്ന് ദേശീയപാതയില്‍ ഏറെ നേരം ഗതാഗതം തടസ്സപ്പെട്ടു. പരിയാരം പൊലിസും നാട്ടുകാരും ചേര്‍ന്നാണ് ഗതാഗതം നിയന്ത്രിച്ചത്. ക്രെയിന്‍ കൊണ്ടുവന്നാണ് ലോറി നീക്കം ചെയ്തത്.