റിയാദ്: നാട്ടുകാരനും സുഹൃത്തുമായ യുവാവിന്റെ ചതിയിൽ പെട്ട് സഊദി ദുബൈ അതിർത്തിയിൽ വെച്ച് മദ്യക്കടത്ത് കേസിൽ സഊദി പോലീസിന്റെ പിടിയിലായ മലയാളിക്ക് കോടതി പിഴയായി വിധിച്ചത് വൻ തുക. നേരത്തെ കോടതി വിധിച്ച ആറ് മാസം തടവിന് പുറമെ പിഴയായി 2,16,000 റിയാൽ നൽകണമെന്നാണ് വിധി. അതിർത്തി പോലീസ് പിടിയിലായ തൃശൂർ പെരിഞ്ഞനം സ്വദേശി ഷുക്കൂറി (57) നാണ് ദമാം ക്രിമിനൽ കോടതി ഏകദേശം 40 ലക്ഷം രൂപയോളം വരുന്ന വൻ തുക പിഴ വിധിച്ചത്. നാല് മാസത്തോളമായി അൽ അഹ്‌സ ജയിലിൽ കഴിയുന്ന ഇദ്ദേഹത്തിന് രാജ്യങ്ങൾക്കിടയിലെ നിയമ സംവിധാനങ്ങളെ കബളിപ്പിച്ചതിനാണ് ദമാം ക്രിമിനൽ കോടതി ഇപ്പോൾ പിഴ വിധിച്ചിരിക്കുന്നത്. അതേസമയം, കേസിന്റെ മുഖ്യ സൂത്രധാരൻ മുഹമ്മദ് റാഫി നാട്ടിൽ സുഖമായി കഴിയുകയാണെന്നാണ് പരാതി. 

 

കുടുംബത്തിന്റെ അത്താണിയായ യുവാവിന്റെ കഥ ഇക്കഴിഞ്ഞ ഡിസംബറിലാണ് പുറത്ത് വന്നത്.  നാട്ടുകാരനും സുഹൃത്തുമായ ആളുടെ കൊടും വഞ്ചനയിലാണ് ഇദ്ദേഹം സഊദിയിൽ അഴിക്കുള്ളിലായത്. സാമൂഹ്യ പ്രവർത്തകൻ  പുറത്തെത്തിച്ച സംഭവം സുപ്രഭാതം റിപ്പോർട്ട് ചെയ്തിരുന്നു.  പിടിക്കപ്പെടുന്നതിന്റെ ഏതാനും മാസം മുമ്പ് ദു​ബൈ​യി​ലെത്തിയ ഇദ്ദേഹം സഊദി അതിർത്തിയിൽ വെച്ചാണ് സഊദിയിലേക്ക് മദ്യം കടത്തിയെന്ന കേസിൽ പിടിയിലാകുന്നത്.  നാ​ട്ടു​കാ​ര​നും പ​രി​ച​യ​ക്കാ​ര​നു​മാ​യ ഷാ​ജി എ​ന്ന് വി​ളി​ക്ക​പ്പെ​ടു​ന്ന മു​ഹ​മ്മ​ദ് റാ​ഫി ന​ൽ​കി​യ ഹെ​വി ഡ്രൈ​വ​ർ വി​സ​യു​മാ​യി അ​യാ​ളു​ടെ അ​ടു​ത്തേ​ക്ക് ത​ന്നെയാണ് ഏഴായിരം റിയാൽ ശമ്പളം വാഗ്ദാനത്തിൽ എ​ത്തി​യ​ത്. കടക്കെണിയിൽ നിന്നും ഷുക്കൂറിനെയും കുടുംബത്തെയും രക്ഷിക്കാമെന്നും ജപ്തി ചെയ്ത വീട് തിരിച്ചു കിട്ടാൻ സഹായിക്കണമെന്നും അറിയിച്ചാണ് ഒക്ടോബറിൽ വിസയും ടിക്കറ്റും നൽകി ദുബൈയിൽ എത്തിച്ചത്. അവിടെ നിന്നുള്ള ആദ്യ ട്രിപ്പ് സഊദിയിലെ ജിദ്ദയിലേക്കായിരുന്നു.  നെ​സ്‌​ലെ​യു​ടെ ക്രീം കയറ്റിയ വാഹനത്തിൽ ഒളിപ്പിച്ചു കടത്തുകയായിരിരുന്ന മദ്യമാണ് പിടിച്ചെടുത്തത്.