റിയാദ്: റിയാദിലെ പ്രമുഖ പ്രവാസി കൂട്ടായ്മയായ നന്മ കരുനാഗപ്പള്ളി സാമൂഹ്യ ജീവകാരുണ്യ രംഗത്ത് വ്യക്തിമുദ്ര പതിപ്പിച്ചവരെ ഹ്യൂമാനിറ്റി ഐക്കൺ‌ പുരസ്കാരങ്ങൾ‌ നൽകി ആദരിക്കും. പ്രവാസ ലോകത്ത് നിന്നും ആയിരക്കണക്കിന് മൃതദേഹങ്ങൾ ദേശ ഭാഷാ വ്യത്യാസമില്ലാതെ  ജന്മനാട്ടിലെത്തിക്കാൻ‌ മുന്നിൽ‌ നില്ക്കുന്ന 'പരേതരുടെ കൂട്ടുകാരൻ' അഷ്‌റഫ് താമരശ്ശേരിയ്ക്ക് നന്മ ഹ്യൂമാനിറ്റി ഐക്കൺ പുരസ്കാരവും, സ്വന്തം‌ അനാരോഗ്യം‌ പോലും വക വെയ്ക്കാതെ ആലംബഹീനരായ രോഗികൾക്ക് വേണ്ടി കേരളത്തിലുടനീളം സഞ്ചരിച്ച് സൗജന്യമായി ഗാനമേളകൾ നടത്തുന്ന യുവഗായിക 'കനിവിന്റെ വാനമ്പാടി' പ്രിയ അച്ചുവിന് നന്മ ഹ്യൂമാനിറ്റി യൂത്ത്  ഐക്കൺ പുരസ്കാരവും നൽകും.  

 

2020 ഏപ്രിൽ‌ 10 ന്  അസീസിയ നെസ്റ്റോ ഓഡിറ്റോറിയത്തിൽ‌ വെച്ച് നന്മോത്സവം‌ 2020 വാർഷിക സമ്മേളനത്തിൽ‌ വെച്ചാണ് പുരസ്കാരങ്ങൾ‌ സമ്മാനിക്കുക. സൗദിയിലെ സാമൂഹ്യ, ജീവകാരുണ്യ, മാധ്യമ, ആതുരസേവന രംഗത്ത് വിലപ്പെട്ട സംഭാവന നല്കുന്നവരെയും ആദരിക്കും. ആഘോഷങ്ങളുടെ ഭാഗമായി കൂട്ടായ്മയിലെ അംഗങ്ങളും‌ സൗദിയിലെ കലാകാരന്മാരും‌ അണി ചേരുന്ന കലാവിരുന്നും‌ കുട്ടികൾക്കും വനിതകൾക്കുമായുള്ള വിവിധ മത്സരങ്ങളും ഒരുക്കിയിട്ടുണ്ട്. ചിത്രകാരനായ സാബു ഫസലിന്റെ ചിത്ര പ്രദർശനവും അരങ്ങേറും.