കൊട്ടാരക്കര: സംസ്ഥാനത്തെ ആദ്യ അസാപ് കമ്യൂണിറ്റി സ്‌കില്‍ പാര്‍ക്ക് കൊട്ടാരക്കര ഏറത്ത് കുളക്കടയില്‍ പ്രവര്‍ത്തനസജ്ജമായി. സ്‌കില്‍ പാര്‍ക്കുകളുടെ സംസ്ഥാന തല ഉദ്ഘാടനം ഇന്ന് മുഖ്യമന്ത്രി പിണറായി വിജയന്‍ നിര്‍വഹിക്കും. കുളക്കട ഗവ. ഹയര്‍ സെക്കന്‍ഡറി സ്‌കൂളിന് എതിര്‍വശത്തായി എം.സി റോഡിനു സമീപത്താണ് സ്‌കില്‍ പാര്‍ക്ക് നിര്‍മിച്ചിട്ടുള്ളത്.
13 കോടി രൂപ ചെലവഴിച്ച് 25000 ചതുരശ്ര അടി വിസ്തൃതി യില്‍ ഒരേക്കറോളം ഭൂമിയിലാണ് ഈ പരിശീലന കേന്ദ്രം ആരംഭിക്കുന്നത്. സംസ്ഥാനത്ത് ഇത്തരം ഒന്‍പത് സ്‌കില്‍ പാര്‍ക്കുകള്‍ പ്രവര്‍ത്തനസജ്ജമായി വരികയാണ്. വെകിട്ട് 3.30ന് കുളക്കട ഗവ. ഹയര്‍ സെക്കന്‍ഡറി സ്‌കൂള്‍ ഗ്രൗണ്ടിലാണ് ഉദ്ഘാടന സമ്മേളനം നടക്കുക. മന്ത്രി കെ.ടി ജലീല്‍ അധ്യക്ഷനാകും. മന്ത്രിമാരായ ജെ. മേഴ്‌സിക്കുട്ടിയമ്മ, കെ. രാജു എം.പിമാരായ കൊടിക്കുന്നില്‍ സുരേഷ്, കെ. സോമപ്രസാദ്, അയിഷാ പോറ്റി എം.എല്‍.എ, ആര്‍. ബാലകൃഷ്ണപിള്ള തുടങ്ങിയവരും ഉദ്യോഗസ്ഥ പ്രമുഖരും സംബന്ധിക്കും.