തലശ്ശേരി: കാവുംഭാഗം പുതിയറോഡിന് സമീപം സ്വകാര്യവ്യക്തിയുടെ പറമ്പില്‍ നിന്ന് വന്‍ ആയുധ ശേഖരം പിടികൂടി. ഒരു സ്റ്റീല്‍ ബോംബ്, അഞ്ച് കണ്ടെയ്‌നര്‍, രണ്ട് മഴു, വടിവാള്‍, ഇരുമ്പ് ദണ്ഡ് എന്നിവയാണ് പിടികൂടിയത്. തലശ്ശേരി സി.ഐ എം.പി ആസാദ്, എസ്.ഐ അനില്‍ കുമാര്‍ എന്നിവരുടെ നേതൃത്വത്തില്‍ കണ്ണൂരില്‍ നിന്നെത്തിയ ബോംബ് സ്‌ക്വാഡ് പരിശോധന നടത്തി. മേഖലയില്‍ ഉത്സവ പറമ്പുകള്‍ കേന്ദ്രീകരിച്ച് സി.പി.എം-ബി.ജെ.പി സംഘര്‍ഷങ്ങള്‍ ഉണ്ടായ പശ്ചാത്തലത്തിലാണ് പൊലിസിന്റെ പരിശോധന കര്‍ശനമാക്കിയത്. എസ്.ഐ ശശീധരന്റെ നേതൃത്വത്തിലുള്ള ബോംബ് സ്‌ക്വാഡില്‍ ജീസ്, പ്രവീണ്‍, സുഗേഷ് എന്നിവരും ഉണ്ടായിരുന്നു. കാവുംഭാഗം മേഖലകളില്‍ ആയുധങ്ങള്‍ കണ്ടെത്തിയ സാഹചര്യത്തില്‍ സുരക്ഷ ശക്തമാക്കി. തലശ്ശേരി മേഖലയില്‍ വരും ദിവസങ്ങളില്‍ ക്ഷേത്ര ഉത്സവങ്ങള്‍ നടക്കുന്നതിനാല്‍ പൊലിസ് ജാഗ്രതയിലാണ്.