മലപ്പുറം: കൊവിഡ് പ്രതിരോധത്തിന്റെ ഭാഗമായി മലപ്പുറത്ത് മദ്യശാലകള്‍ അടച്ചിടാന്‍ തീരുമാനം. മലപ്പുറം നഗരസഭ പരിധിയിലെ ബിവറേജസ് കോര്‍പറേഷന്റെയും കണ്‍സ്യൂമര്‍ ഫെഡിന്റെയും മദ്യശാലകള്‍ അടച്ചിടാനാണ് തീരുമാനമായിരിക്കുന്നത്. ഈ മാസം 31 വരെ അടച്ചിടാനാണ് നഗരസഭാ കൗണ്‍സില്‍ നോട്ടിസ് നല്‍കിയിരിക്കുന്നത്.

ബുധനാഴ്ച്ചയാണ് മദ്യശാലകള്‍ അടയ്ക്കാന്‍ നോട്ടിസ് നല്‍കാന്‍ തീരുമാനമായത്. പ്രതിപക്ഷത്തിന്റെ വിയോജിപ്പോടെയാണ് നടപടികള്‍ക്ക് കൗണ്‍സില്‍ അംഗീകാരം നല്‍കിയത്. ഇതു സംബന്ധിച്ച് മദ്യശാലകള്‍ക്ക് നോട്ടിസ് നല്‍കാന്‍ സെക്രട്ടറിയിക്ക് നിര്‍ദ്ദേശം നല്‍കിയതായി നഗരസഭാ ചെയര്‍പേഴ്‌സണ്‍ സി.എച്ച് ജമീല അറിയിച്ചു.

കൊവിഡ് വ്യാപനം തടയുന്നതിന്റെ ഭാഗമായി വിദ്യാഭ്യാസ സ്ഥാപനങ്ങള്‍ ഉള്‍പ്പെടെ അടച്ചിട്ട സാഹര്യത്തില്‍ നൂറുകണക്കിന് ആളുകള്‍ വരുന്ന മദ്യശാലകള്‍ തുറന്നുപ്രവര്‍ത്തിക്കുന്നത് സമൂഹവ്യാപനത്തിനിടയാക്കുമെന്ന് ചൂണ്ടിക്കാട്ടി കൗണ്‍സിലര്‍ ഹാരിസ് ആമിയനാണ് കൗണ്‍സിലില്‍ കത്ത് നല്‍കിയത്.

അതേസമയം, ബിവറേജസ് ഔട്ട്‌ലെറ്റുകളും ബാറുകളും പൂട്ടണമെന്ന് പ്രതിപക്ഷ നേതാവ് രമേശ് ചെന്നിത്തലയും ആവശ്യപ്പെട്ടിരുന്നു.