തലശേരി: കണ്ണൂരില്‍ സിപിഎം ഓഫീസ് ആക്രമിച്ചെന്ന പരാതിയില്‍ അറസ്റ്റ് ചെയ്ത് ജയിലിലടച്ച ദലിത് സഹോദരിമാരില്‍ ഒരാള്‍ ആത്മഹത്യക്ക് ശ്രമിച്ചു. തലശ്ശേരി കുട്ടിമാക്കൂലിലെ കുനിയില്‍ രാജന്റെ മകള്‍ അഞ്ജനയാണ് ആത്മഹത്യക്ക് ശ്രമിച്ചത്. ഇന്നലെ രാത്രിയില്‍ അമിതമായി ഗുളികകള്‍ കഴിച്ച് അവശനിലയില്‍ കണ്ടെത്തിയ അഞ്ജനയെ തലശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

തലശ്ശേരി കുട്ടിമാക്കൂലില്‍ സിപിഎം പ്രവര്‍ത്തകരെ ആക്രമിച്ചെന്ന പരാതിയില്‍ ജയിലിലടയ്ക്കപ്പെട്ട സഹോദരിമാരില്‍ ഒരാളാണ് അഞ്ജന. ഇരുവരും ജാമ്യത്തിലിറങ്ങിയിരുന്നു. സ്വകാര്യ ചാനലിന്റെ ചര്‍ച്ചക്കിടെ അപമാനകരമായ പരാമര്‍ശമുണ്ടായതിനെ തുടര്‍ന്നാണ് ആത്മഹത്യാശ്രമമമെന്നാണ് ബന്ധുക്കളുടെ ആരോപണം. അഞ്ജന തലശ്ശേരി ഇന്ദിരാഗാന്ധി സഹകരണ ആശുപത്രിയില്‍ ചികിത്സയിലാണ്.  അപകടനില തരണംചെയ്തതായി ഡോക്ടര്‍മാര്‍ അറിയിച്ചു.

കഴിഞ്ഞ ദിവസം കുട്ടിമാക്കൂലില്‍ ഡി.വൈ.എഫ്.ഐ തിരുവങ്ങാട് സെക്രട്ടറിയും സി.പി.ഐ.എം അംഗവുമായ ഷിജിനെ ആക്രമിച്ചുവെന്ന പരാതിയിലാണ് പെണ്‍കുട്ടികളെ ജാമ്യമില്ലാ വകുപ്പ് പ്രകാരം ജയിലിലടച്ചത്