വടക്കാഞ്ചേരി: കുപ്രസിദ്ധ മോഷ്ടാവ് പാലാരിവട്ടം കോച്ചാപ്പിള്ളി വീട്ടില്‍ ജോണിനെ ( കീ ഹോള്‍ ജോണ്‍ 55) നാട്ടുകാര്‍ പിടികൂടി പൊലിസിലേല്‍പ്പിച്ചു. കഴിഞ്ഞ രാത്രി 11 മണിയോടുകൂടി എങ്കക്കാട് കുന്നത്ത് പറമ്പില്‍ പതുങ്ങി നടക്കുന്നതിനിടയിലാണ് പിടിയിലായത്.
നാട്ടുകാരനായ പയറ്റുശാലയില്‍ സുനില്‍കുമാര്‍ സംശയം തോന്നി ചോദ്യം ചെയ്തപ്പോള്‍ സുനിലിനെ ആക്രമിച്ച് ഓടി രക്ഷപ്പെടാന്‍ ശ്രമിക്കുകയായിരുന്നു. ഇടിയേറ്റെങ്കിലും സുനില്‍ സാഹസികമായി ഇയാളെ കീഴ്‌പ്പെപ്പെടുത്തി പരിസരവാസികളെ വിളിച്ചുകൂട്ടി. നഗരസഭാ കൗണ്‍സിലര്‍ വി.പി മധുവിന്റെ നേതൃത്വത്തില്‍ വടക്കാഞ്ചേരി പൊലിസ് സ്റ്റേഷനില്‍ ഏല്‍പ്പിച്ചു. ജോണിന്റെ കൈവശമുണ്ടായിരുന്ന ബാഗില്‍ നിന്ന് വീടുകള്‍ കുത്തിതുറക്കുന്നതിനുള്ള ആയുധങ്ങളും മുളകുപൊടി ഉള്‍പ്പെടെയുള്ള സാധനങ്ങളും കണ്ടെടുത്തിട്ടുണ്ട്. വിരലടയാളങ്ങള്‍ ശേഖരിച്ച് സൈബര്‍ സെല്ലിന്റെ സഹായത്തോടെ സമഗ്ര അന്വേഷണം ആരംഭിച്ചതായി പൊലിസ് അറിയിച്ചു.