വടകര: വിഷ്ണുമംഗലം പമ്പ് ഹൗസിലെ മോട്ടോര്‍ തകരാറിലാവുന്നത് പതിവായതോടെ കുടിവെള്ള വിതരണം താറുമാറായി. അഴിയൂര്‍, ചോറോട്, ഒഞ്ചിയം, ഏറാമല, എടച്ചേരി പഞ്ചായത്തുകളിലും വടകര മുനിസിപ്പാലിറ്റിയിലെ വീരഞ്ചേരി, കസ്റ്റംസ് റോഡ്, കുരിയാടി, ആവിക്കല്‍ ഭാഗങ്ങളിലും ശുദ്ധജല വിതരണം തടസപ്പെട്ടു.
ഒരു മാസത്തിനിടയില്‍ മൂന്നാമത്തെ പ്രാവശ്യമാണ് മോട്ടോര്‍ തകരാറിലാവുന്നത്. നിലവിലുള്ള മോട്ടോറിനു കേടുപറ്റിയാല്‍ പകരം മറ്റൊന്ന് ഇല്ലാത്തതിനാല്‍ ഇതിനു പരിഹാരമാകുന്നതുവരെ ജല വിതരണം നിര്‍ത്തേണ്ട സ്ഥിതിയാണ്.
കാസര്‍കോട്ടെ സ്ഥാപനത്തിനാണ് സര്‍വിസിന്റെ ചുമതല. അവിടെ നിന്ന് അധികൃതരെത്തി തകരാര്‍ പരിഹരിക്കുമ്പോഴേക്കും ദിവസങ്ങളെടുക്കും.
അതിനിടെ കുടിവെള്ളം മുടങ്ങുന്നത് പതിവായതോടെ നടപടിയെടുക്കാന്‍ വാട്ടര്‍ അതോറിറ്റി അധികൃതരും തയാറാകുന്നില്ല.
തകരാര്‍ പരിഹരിക്കാന്‍ മൂന്നും നാലും ദിവസമാണ് എടുക്കുന്നത്. ഇക്കാര്യം പത്രക്കുറിപ്പായി നല്‍കി കൈകഴുകുകയാണ് ഉദ്യോഗസ്ഥര്‍.